Pensiya islohoti: endi 2 yillik to‘lovni qaytarib olish mumkin

O‘zbekiston Respublikasi Pensiya jamg‘armasi talab qilinmagan pensiyalar to‘lovi bilan bog‘liq qonunchilikdagi muhim o‘zgarishlar haqida ma’lum qildi, deb UPL.uz xabar berdi.
Endilikda turli sabablarga ko‘ra o‘z vaqtida olinmagan pensiyalar bo‘yicha to‘lovlarni olish huquqi uzoqroq muddatni qamrab oladi.

Yangi qonunga muvofiq, pensiya oluvchiga tayinlangan, ammo undan talab qilinmagan pensiya to‘lovlarini berish muddati 12 oydan 24 oygacha uzaytirildi.

Masalan, agar siz ikki yil davomida xorijda bo‘lib, pensiya olish imkoniga ega bo‘lmagan bo‘lsangiz, O‘zbekistonga qaytgach, shu ikki yillik pensiyani to‘liq olish huquqiga egasiz. Bu to‘lov pensiya to‘xtatilgan sanadan boshlab amalga oshiriladi.

Bunday holatda pensiya to‘lovlarini qayta tiklash uchun tuman (shahar) Pensiya jamg‘armasi bo‘limlariga murojaat qilish kerak.