O‘zbekistonda transport xavfsizligini kuchaytirish va yo‘lovchilarning hayotini himoya qilishga qaratilgan yangi qonun qabul qilindi. Senatning navbatdagi yalpi majlisida ma’qullangan hujjatga ko‘ra, endi temir yo‘l va metro tizimida yo‘lovchi tashish qoidalarini buzgan mansabdor shaxslar qattiq javobgarlikka tortiladi.
Yangi tartibga binoan, bunday holatlar aniqlansa, qoidabuzar mansabdor shaxs BHMning 10 baravari miqdorida jarima to‘laydi. Mutasaddilarning ta’kidlashicha, bu chora nafaqat intizomni kuchaytirish, balki yo‘lovchilar uchun xavfsiz va qulay shart-sharoit yaratishga qaratilgan.
Shuningdek, xalqaro va shaharlararo yo‘nalishlarda xizmat qiladigan haydovchilarning mehnat va dam olish tartibini buzishi ham alohida nazoratga olinmoqda. Agar bunday holat kuzatilsa, haydovchilar BHMning 7 baravari miqdorida jarimaga tortiladi.
Mutaxassislar fikricha, transport sohasida qat’iy javobgarlik tizimining joriy etilishi tartib-intizomni mustahkamlaydi va yo‘lovchilarning xavfsizligini ta’minlaydi. Shu bilan birga, bunday choralar jamoat transportiga bo‘lgan ishonchni ham oshiradi.
Senatorlar ta’kidlaganidek, qonun kuchga kirgach, tashuvchilar va haydovchilarning mas’uliyati yanada ortiriladi. Bu esa mamlakatdagi transport xizmatlari sifati va xavfsizligi uchun muhim qadam sifatida baholanmoqda.
“Zamin”ni Telegramʻda oʻqing!
