Namangan viloyati yana bir bor tarix va madaniy merosni o‘rganishda muhim yangilik bilan e’tibor markaziga aylandi. Viloyat hokimligi matbuot xizmati ma’lumoticha, VIII asrga oid qo‘lyozma hamda Abbosiylar davrida zarb etilgan tangalar topildi.
Axsikent arxeologiya parki tarkibidagi Yangi Axsi majmuasi fondlari 68 ta yangi tanga va 27 ta kitob bilan boyidi. Arxeologlar ta’kidlashicha, Abbosiylar hukmronligi davriga oid kumush tangalar o‘ziga xos bezakli arab yozuvlari bilan ajralib turadi.
Qo‘lyozma kitob esa ilm-fanning turli sohalariga bag‘ishlangan. Unda handasa, riyoziyot, astronomiya va tibbiyotga oid qimmatli ma’lumotlar jamlangan. Mazkur asar o‘sha davrda ilm-fan qay darajada rivojlanganini ko‘rsatadigan muhim manba sifatida baholanmoqda.
Shuningdek, topilmalar orasida Somoniylar va Qoraxoniylar davriga tegishli tangalar ham uchradi. Qolaversa, 1667–1670 yillarda Shvetsiyada, 1836 yilda esa Buyuk Britaniyada chiqarilgan tangalar ham mavjudligi ma’lum qilindi.
Mutaxassislar ta’kidlashicha, ilk kumush tangalar miloddan avvalgi III asrdayoq chiqarilgan. Ularning yuza qismida – aversida podsholarning surati, orqa qismida esa turli xudolar, muqaddas hayvonlar yoki hukmdorlarning nomlari va tamg‘alari tasvirlangan.
Ayni paytda ham qazishma ishlari izchil davom etmoqda. Arxeologlar topilmalar nafaqat mahalliy, balki xalqaro ilmiy hamjamiyat uchun ham katta qiziqish uyg‘otishini ta’kidlashmoqda.
“Zamin”ni Telegramʻda oʻqing!
