O‘zbekistonda maktablar uchun 20 mln dollar ajratiladi

Namanganda bo‘lib o‘tgan “Kambag‘allikdan farovonlik sari” xalqaro forumida “Ishonch” jamg‘armasi O‘zbekistondagi maktablar sifatini oshirish uchun 20 mln dollar ajratishini e’lon qildi, deb yozmoqda Latipov telegram kanali.

Mablag‘lar maktablarda suv ta’minoti, sanitariya va gigiyena, ekologik toza energiya va xavfsiz isitish tizimlarini o‘rnatishga yo‘naltiriladi. 45 ta qishloq maktabi ta’mirlanadi, bu 31 500 nafar bola, ayniqsa o‘smir qizlar uchun qulay va xavfsiz ta’lim sharoitini yaratadi.

Shuningdek, 2700 nafar o‘qituvchi va xodim iqlim o‘zgarishiga chidamlilik va gigiyena bo‘yicha o‘qitiladi. Loyiha “Eng yaxshi maktabim” portali orqali jamoatchilik tomonidan real vaqtda kuzatiladi.