Poytaxt ko‘chalarida yo‘l harakati xavfsizligini ta’minlash maqsadida navbatdagi qat’iy choralar amalga oshirilmoqda. YHXX xodimlari haydovchilik guvohnomasisiz va davlat raqam belgisiz skuter haydovchilarini to‘xtatib, ularga nisbatan ma’muriy jarima qo‘llayapti. Bu haqda mahalliy manbalar xabar berdi.
Ma’lumotlarga ko‘ra, o‘tgan oyda joriy etilgan yangi tartibga ko‘ra, 1 oktyabrdan boshlab moped va skuterlarni boshqarish uchun albatta “A” toifadagi haydovchilik guvohnomasiga ega bo‘lish va transport vositasiga davlat raqam belgisi o‘rnatish shart qilib qo‘yilgan. Bu talablarni e’tiborsiz qoldirgan haydovchilarning ulovlari esa jarima maydoniga joylashtirilayotgani ma’lum qilindi.
YHXX mas’ullari ta’kidlashicha, yangi qoidalarning joriy etilishiga sabab yo‘llarda xavfsizlikni ta’minlash va noqonuniy harakatlarni oldini olishdir. Skuter va moped haydovchilari ko‘pincha harakat qoidalariga beparvo munosabatda bo‘lib, ko‘plab yo‘l-transport hodisalariga sababchi bo‘layotgani statistik ma’lumotlarda qayd etilgan. Shu bois, nazorat kuchaytirildi va qonunbuzarlarga nisbatan keskin choralar ko‘rilmoqda.
Ta’kidlanishicha, ko‘p hollarda haydovchilar “prava”siz harakat qilayotgani, ayrimlari esa davlat raqam belgisini o‘rnatmagani aniqlanmoqda. Bu esa fuqarolarning o‘zini va boshqa yo‘lovchilar hayotini xavf ostiga qo‘yishi mumkin.
Huquq-tartibot idoralari aholini yangi talablarga jiddiy yondoshishga chaqirmoqda. Maxsus reydlar davomida qoidalarni buzgan haydovchilarga nisbatan ma’muriy ish ochiladi, ularning transport vositalari esa vaqtincha jarima maydoniga olib ketiladi.
Mutasaddilarning qo‘shimcha qilishicha, bu choralar odamlar xavfsizligini ta’minlash hamda yo‘l-transport hodisalarini kamaytirishga qaratilgan. Ayni paytda, fuqarolar qonunchilik talablariga amal qilsa, ularning ulovi va shaxsiy xavfsizligi himoyada bo‘ladi.
“Zamin”ni Telegramʻda oʻqing!
