O‘zbekistonda elektron bojxona deklaratsiyasi topshirish tizimi ishga tushirildi, deb Kursiv.media xabar berdi. Endilikda fuqarolar “Yo‘lovchi deklaratsiyasi” mobil ilovasi orqali smartfon va boshqa tovarlarni bojxonada ro‘yxatdan o‘tkazishi mumkin.
Hozircha bu servis faqat Toshkent xalqaro aeroporti orqali O‘zbekistonga kirib kelgan sayohatchilar uchun mavjud. Ammo 2025 yil 1 noyabrdan boshlab, u barcha chegara o‘tish punktlarida faoliyat ko‘rsatadi.
Ilova foydalanuvchining pasport ma’lumotlari asosida deklaratsiyaning asosiy bo‘limlarini avtomatik to‘ldiradi. Faqat kirish yoki chiqish mamlakatini va olib kirilayotgan valyuta hamda tovarlar haqida ma’lumot kiritish talab etiladi.
Shuningdek, smartfonlarni ro‘yxatdan o‘tkazishda 15 raqamli IMEI-kodni avtomatik skanerlash imkoniyati mavjud. Bu ma’lumotlarni qo‘lda kiritish zaruratini yo‘q qiladi.
Eng asosiysi, yo‘lovchilar deklaratsiyani o‘zlariga qulay vaqtda va joyda to‘ldirishlari mumkin. Chegara punktlarida maxsus infokioska va bepul Wi-Fi zonalari tashkil etiladi.
“Zamin”ni Telegramʻda oʻqing!
