Rossiyalik sinoptik O‘zbekistonda qachon qor yog‘ishi kutilayotganini aytdi

So‘nggi kunlarda O‘zbekistonda tungi sovuqlar kuzatilmoqda. Bu holat kuz faslining faol bosqichga kirayotganini ko‘rsatmoqda.

Rossiyalik sinoptik Eduard Mixaylov mamlakatda birinchi jiddiy qor qachon yog‘ishi mumkinligi haqida ma’lumot berdi. Uning so‘zlariga ko‘ra, oktabr oxiri va noyabr boshlarida qor yog‘ishi kutilmaydi, deb UPL.uz xabar berdi.

Sinoptikning ta’kidlashicha, aniq ob-havo prognozi 3-5 kunlik bo‘lib, aniqligi 96% ga yetadi. 5-7 kunlik prognoz aniqligi 85-87% bo‘lsa, 14 kundan uzoq muddatli prognozlar odatda taxminiy hisoblanadi.

Shuningdek, Markaziy Osiyo iqlimiga xos xususiyatlar va avvalgi yillardagi ma’lumotlar asosida qor kamida noyabr o‘rtasidan boshlab yog‘ishi mumkinligi aytildi.

So‘nggi yillarda mintaqada qishlar ancha sovuq kechmoqda. Bu atmosfera beqarorligi sababli yuz berayotgan bo‘lib, Arktika havosining janubiy hududlarga ta’siri ortib bormoqda.

Umuman olganda, global isish bo‘lishiga qaramay, bu yil ham o‘tgan yilga o‘xshash sovuq va barqaror qish kuzatilishi mumkin, dedi Eduard Mixaylov.

Nodirbek Razzokov

«ZAMIN.UZ» muharriri