Matematika fanidan bo‘lib o‘tgan tuman (shahar) bosqichi olimpiadasi yuzasidan kutilmagan holat qayd etildi. Ijtimoiy tarmoqlarda olimpiada savollari musobaqa boshlanishidan oldin tarqalib ketgani haqida ma’lumotlar paydo bo‘ldi. Bu holat jamoatchilik orasida katta muhokamaga sabab bo‘ldi, deb xabar berdi Ixtisoslashtirilgan ta’lim muassasalari agentligi.
Ma’lum qilinishicha, mazkur savollar Fan olimpiadalari markazi tomonidan maxsus ishchi guruhlar ishtirokida tuzilgan va har bir hududda markazlashgan holda chop etilgan. Biroq ayrim hududlarda savollarni chop etish jarayonida mas’ul shaxslar tomonidan tartib buzilib, materiallar noqonuniy yo‘l bilan tashqarigi chiqib ketgan.
Agentlikning rasmiy ma’lumotiga ko‘ra, ayrim xodimlar savollardan namuna olib, ularni ijtimoiy tarmoqlar yoki messenjerlar orqali tarqatgan. Bu holat sinov natijalariga ta’sir ko‘rsatishi mumkinligi sababli, matematika fanidan olimpiadaning tuman (shahar) bosqichi barcha sinflar bo‘yicha — 9-, 10- va 11-sinflarda — qayta o‘tkazilishi belgilandi.
“Hozirda bu qoidabuzarlikka sababchi shaxslar aniqlanmoqda. Ular amaldagi qonunchilik doirasida javobgarlikka tortiladi. Fan olimpiadalari markazi barcha bosqichlarda jarayonlarning shaffof va xolis bo‘lishi tarafdori”, — deyiladi agentlik bayonotida.
“Zamin”ni Telegramʻda oʻqing!
