O‘zbekistonlik talabalarning chet elda ta’lim olishga bo‘lgan qiziqishi saqlanib turibdi, ammo ularning umumiy soni kamaygan. Milliy statistika qo‘mitasi ma’lumotlariga ko‘ra, 2025 yilning yanvar–avgust oylarida 20,7 ming nafar fuqaro o‘qish maqsadida xorijga yo‘l olgan. Bu ko‘rsatkich o‘tgan yilga nisbatan 24,6 foizga kam, deb xabar berdi idoraviy manbalar.
Ma’lum qilinishicha, o‘zbekistonlik yoshlar eng ko‘p yaqin qo‘shni Tojikistonni tanlamoqda. Bu yerda 5 270 nafar talabamiz tahsil olmoqda. Rossiyada 4 649, Qirg‘izistonda 3 064, Koreya Respublikasida 2 309, Turkiyada 1 538 nafar vatandoshlarimiz o‘qimoqda. Shuningdek, Qozog‘iston (874 nafar), Xitoy (797), Buyuk Britaniya (567), Germaniya (285) va AQSH (256) ham talabalar manzili bo‘lib turibdi.
Ekspertlar fikricha, yoshlar asosan qo‘shni mamlakatlardagi oliygohlarni tanlamoqda, chunki qabul tizimi sodda va ta’lim xarajatlari nisbatan arzon. Biroq so‘nggi yillarda Koreya va Turkiya universitetlariga qiziqish keskin ortgan — bu davlatlar xalqaro reytinglarda yuqori o‘rinlarini saqlab turibdi va stipendiya dasturlarini kengaytirmoqda.
“Zamin”ni Telegramʻda oʻqing!
