Toshkentdagi savdo-ko‘ngilochar markazlarda o‘zini haddan oshirib yuradigan suratchilar faoliyati fuqarolarning noroziligiga sabab bo‘lmoqda, deb UPL xabar berdi.
Xususan, High Town Mall savdo markazida ayrim suratchilar ota-onalarning roziligisiz bolalarni suratga olib, so‘ngra ularning suratlari tushirilgan magnit yoki krujka kabi mahsulotlarni majburiy sotishga urinishmoqda. Ular bolalarni deyarli quvib yurib, maydonchadan chiqqan zahoti ota-onalarga murojaat qilishadi.
UPL muxbiri eksperiment tariqasida bolalarining suratlari tushirilgan ikki magnitni 60 ming so‘mdan sotib oldi. Oradan ko‘p o‘tmay, boshqa bir suratchi kelib, bolalar krujka buyurtma berganini aytdi va har biri uchun 100 ming so‘m talab qildi. Bu kabi holatlar nafaqat aholi, balki sayyohlar orasida ham salbiy taassurot uyg‘otmoqda.
Ma’lum qilinishicha, O‘zbekistonda shaxs va bolalarni suratga olish uchun alohida ruxsatnoma olishni majburiy qiluvchi huquqiy hujjat ishlab chiqilmoqda. Bu kabi holatlarga qonuniy chora ko‘rilishi kutilmoqda.
