O‘zbekistonda 2026 yildan boshlab yangi quriladigan turar joy majmualari va boshqa obyektlarga faqat o‘zbek tilida nom beriladi. Bu haqda Vazirlar Mahkamasining 22 oktyabr kuni qabul qilingan qarorida ma’lum qilindi.
Qarorga ko‘ra, kelgusi yildan boshlab har bir yangi qurilish obyektining nomi, bino pasporti, peshlavhasi, reklama va e’lonlaridagi yozuvlar davlat tilida bo‘lishi shart. Hujjatlarda o‘zbek tili me’yorlariga qat’iy amal qilish talab etiladi.
Shuningdek, qurilishga oid barcha texnik, mualliflik va nazorat hujjatlari tegishli hududiy inspeksiyalarga davlat tili talablariga mos holda taqdim etiladi.
Hujjatda, shu bilan birga, qurilish sohasidagi “E-XSUD” va ekologiya yo‘nalishidagi ruxsatnoma tizimlarini “Kadastr va ro‘yxatdan o‘tkazish integratsiyalashgan axborot tizimi” hamda “Shaffof qurilish” platformalari bilan bog‘lash vazifasi yuklatilgan.
Mazkur qaror rasmiy e’lon qilingan sanadan uch oy o‘tgach, ya’ni 2026 yil boshidan amalga kiritiladi.
Mutaxassislar bu qarorni davlat tili mavqeini mustahkamlash va shaharlarda til madaniyatini oshirish yo‘lidagi muhim qadam sifatida baholamoqda.
“Zamin”ni Telegramʻda oʻqing!
