O‘zbekistonlik haydovchilar uchun yangi ish imkoniyati paydo bo‘ldi. O‘zbekiston Bosh konsulxonasi va Birlashgan Arab Amirliklaridagi “Dubai Taxi Company PJSC” rahbariyati o‘rtasida ikki tomonlama muzokaralar bo‘lib o‘tdi, deb xabar berdi manbalar.
Uchrashuvda O‘zbekistondan malakali haydovchilarni BAAda qonuniy ravishda ishga joylashtirish, ularning huquqlarini himoya qilish va mehnat shartlarini shaffof tashkil etish masalalari muhokama qilindi.
Kompaniya rahbari Sayid Amin Abdulrahman o‘z nutqida o‘zbekistonlik haydovchilarning mas’uliyati va tajribasini yuqori baholab, ularni Dubay taksi xizmatida ishga jalb etishga tayyorligini bildirdi.
Uning ta’kidlashicha, dastlabki bosqichda 200 nafar haydovchi ishga qabul qilinishi mumkin. Agar ularning faoliyati samarali bo‘lsa, yana 500 nafargacha o‘zbekistonlik fuqarolarni jalb etish rejalashtirilgan.
Muzokaralar yakunida O‘zbekiston Mehnat agentligi va “Dubai Taxi Company PJSC” kompaniyasi o‘rtasida hamkorlikni amaliy bosqichga olib chiqish bo‘yicha kelishuvga erishildi.
Mahalliy mutaxassislar fikricha, mazkur loyiha nafaqat ish bilan ta’minlash sohasida muhim qadam, balki O‘zbekiston haydovchilarining xorijiy mehnat bozoridagi obro‘sini yanada mustahkamlaydi.
“Zamin”ni Telegramʻda oʻqing!
