O‘zbekistonda voyaga yetmaganlarga nisbatan jinoiy javobgarlik tizimi yanada yumshatildi. Bu haqda 23 oktyabr kuni qabul qilingan “Voyaga yetmaganlarga nisbatan jinoiy javobgarlikni yanada liberallashtirish to‘g‘risida”gi qonunda belgilandi, deb xabar berdi rasmiy manbalar.
Yangi o‘zgarishlarga ko‘ra, 18 yoshga to‘lguncha jinoyat sodir etib, jazosini to‘liq o‘tab bo‘lgan shaxslar endi sudlanmagan hisoblanadi. Bu norma o‘smirlarning keyingi hayotiga dog‘ tushirmaslik va jamiyatga qayta moslashish imkonini berishga qaratilgan.
Biroq qonunning bu tartibi og‘ir va o‘ta og‘ir jinoyatlar sodir etganlarga hamda jazoni o‘tab bo‘lganidan keyin yana jinoyat qilganlarga taalluqli emas.
Shuningdek, voyaga yetmaganlar uchun ozodlikni cheklash yoki ozodlikdan mahrum etishning minimal muddati olti oydan bir oygacha qisqartirildi.
Ma’lumot uchun, mazkur qonun Qonunchilik palatasi tomonidan 2023 yil 4 iyulda qabul qilingan va Senat tomonidan 2025 yil 1 avgustda ma’qullangan.
Mutaxassislar ta’kidlashicha, ushbu o‘zgarishlar jazoni o‘tagan o‘smirlarni hayotga qaytarish va ularga ikkinchi imkoniyat berishni maqsad qiladi.
“Zamin”ni Telegramʻda oʻqing!
