O‘zbekistonda maktab direktorlari, ularning o‘rinbosarlari va o‘qituvchilariga mehnat samaradorligiga qarab oylik ustama haqlar joriy etildi, deb xabar berdi Vazirlar Mahkamasi.
Yangi tizimga ko‘ra, ta’lim muassasalari rahbarlari va pedagoglar faoliyati KPI — asosiy ish ko‘rsatkichlari bo‘yicha baholanadi. Ularga to‘lanadigan bonuslar har oy to‘plangan ballar asosida belgilanadi.
Direktorlar uchun 61–70 ball to‘plaganlarga 3 foiz, 71–80 ballga — 10 foiz, 81–90 ballga — 15 foiz, 91–100 ball to‘plaganlarga esa 20 foiz ustama haq beriladi. Direktor o‘rinbosarlari uchun esa bu ko‘rsatkichlar 2,5 foizdan 10 foizgacha bo‘ladi.
Bonus olish huquqi maktabda rahbarlik lavozimida kamida to‘qqiz oy faoliyat yuritgan shaxslarga beriladi. Baholash mezonlari o‘quvchilarning bilim darajasi, fan olimpiadalaridagi yutuqlar, ijodiy faollik va tarbiyaviy ishlar samaradorligini qamrab oladi.
Shuningdek, “Zakovat” to‘garaklari rahbarlariga oylik maoshning 50 foizi miqdorida bir martalik bonus beriladi. Jismoniy tarbiya o‘qituvchilari esa faoliyati samaradorligiga qarab 20 foizgacha rag‘bat puli oladi.
Mutasaddilar ta’kidlashicha, ushbu tizim o‘qituvchilar mehnatini adolatli baholash, kasbiy mahoratni oshirish va ta’lim sifatiga ijobiy ta’sir ko‘rsatishga qaratilgan.
“Zamin”ni Telegramʻda oʻqing!
