O‘zbekistonda hibsda saqlanayotgan shaxslar huquqlarini kengaytirishga qaratilgan yangi tartiblar joriy etilishi kutilayapti. 18 noyabr kuni Oliy Majlis Qonunchilik palatasi qonun loyihasini birinchi o‘qishda ma’qulladi.
Loyiha tergov hibsxonalaridagi sharoitni yaxshilash, amaldagi qoidalarni xalqaro standartlarga yaqinlashtirish va insonparvar yondashuvni kuchaytirishni maqsad qiladi.
Yangiliklarning eng muhim qismi — ochiq havoda bo‘lish vaqti va moliyaviy xarajat limiti oshirilashi. Mavjud tartibga ko‘ra, mahkumlar kunlik sayr uchun kamida bir soat ajrata olardi. Yangi normalar qabul qilinsa, dam olish va bayram kunlarida ularga kamida ikki soat sayr qilish va jismoniy mashqlar bilan shug‘ullanish imkoni beriladi.
Moliyaviy cheklovlar ham qayta ko‘rib chiqiladi. Hozirda mahkumlar o‘z ehtiyojlari uchun eng kam oylik ish haqining 50 foizi — 635 500 so‘mgacha mablag‘ sarflashi mumkin. Qonun kuchga kirsa, limit 100 foizga, ya’ni 1 271 000 so‘mgacha ko‘tariladi.
Hujjat tergov izolatorlaridagi turmush sharoitlarini yaxshilashga qaratilgan bir qator qo‘shimcha normalarni ham o‘z ichiga oladi. Ombudsman fikricha, bu o‘zgarishlar insonparvarlik tamoyillarini mustahkamlab, milliy qonunlarni xalqaro tajribalarga yaqinlashtirishga xizmat qiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
