Keyingi yildan mamlakatga keladigan xorijlik sayyohlar uchun bir qator zamonaviy qulayliklar joriy etiladi. Prezident tomonidan 20 noyabr kuni imzolagan qarorga ko‘ra, 2026 yil 1 iyuldan boshlab turistlar chegaradan o‘tar ekan, ularning roziligi bilan ma’lumotlar integratsiya qilinadi va maxsus turistik elektron SIM-karta avtomatik tarzda taqdim etiladi. Shu bilan birga, mehmonlarni vaqtincha ro‘yxatdan o‘tkazish ham proaktiv shaklda amalga oshiriladi.
Yangi milliy turizm platformasi va uning mobil ilovasi orqali bir qator keng imkoniyatlar ochiladi. Endilikda transportning barcha turlari yagona tizimga bog‘lanadi, sayyohlar eng maqbul yo‘nalishni tanlab, chiptalarni onlayn rezervatsiya qilish imkoniga ega bo‘ladi.
Shuningdek, muzeylar, madaniy meros obyektlari va dam olish maskanlariga elektron bilet sotib olishga mo‘ljallangan yagona chipta tizimi ishga tushiriladi. Ekskursiyalar uchun interaktiv xaritalar, audio va video yo‘ldoshlar, inchunin onlayn translyatsiyalar orqali ma’lumot berish imkonini yaratuvchi raqamli gid tizimi ishlay boshlaydi.
Turistik yig‘imlarni mehmonxonalar avtomatik tarzda billing orqali Jamg‘armaga o‘tkazadi. Shu bilan birga, aholi tomonidan dala hovlilarini ijaraga berish jarayoni ham soddalashtirilib, “Soliq” ilovasida “men bilan birga” tartibida rasmiylashtiriladi.
2026 yil yakuniga qadar “Xavfsiz shahar” tizimi bilan integratsiya qilingan holda, turistlar oqimi, ularning qiziqishlari va harakatlanishini tahlil qiladigan sun’iy intellekt platformasi ishga tushiriladi. Bu orqali individual marshrutlar, dinamik takliflar va narx shakllanishi yanada qulay tarzda boshqariladi.
Xulosa qilib aytganda, yangi raqamli tizimlar O‘zbekiston turizmiga yangi bosqich ochishi kutilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
