Jinoyat-ijroiya kodeksiga kiritilgan yangi o‘zgartirishlar mahkumlar uchun muloqot imkoniyatlarini kengaytirmoqda. Yangi qonunga ko‘ra, ozodlikdan mahrum etilgan shaxslarga yaqinlari bilan masofadan turib videouchrashuv qilish huquqi berildi. Tegishli hujjat 2026-yil 15-yanvar kuni qabul qilingan bo‘lib, rasmiy e’lon qilingan kundan boshlab kuchga kiradi.
Qonun talablariga muvofiq, mahkumlar o‘z shaxsiy mablag‘lari hisobidan to‘lanadigan, 15 daqiqa davom etadigan bir martalik masofaviy videouchrashuv yoki telefon orqali suhbatlashish imkoniyatiga ega bo‘ladi. Bu qadam, avvalo, mahkumlarning oila a’zolari va yaqinlari bilan aloqasini uzib qo‘ymaslikka qaratilgan.
Avvalgi tartibda esa bunday muloqot faqat 15 daqiqalik bir martalik telefon qo‘ng‘irog‘i bilan cheklangan edi. Endilikda videomuloqot ham qonuniy asosda mustahkamlanib, mahkumga qo‘shimcha variant sifatida taqdim etilmoqda.
Mutaxassislar fikricha, masofaviy videouchrashuvlarni joriy etish mahkumlarning ijtimoiy bog‘liqligini saqlash, ruhiy barqarorlikni qo‘llab-quvvatlash, shu bilan birga jazoni ijro etish tizimida zamonaviy texnologiyalardan foydalanishni yanada kengaytirishga xizmat qilishi kutilmoqda.
“Zamin”ni Telegramʻda oʻqing!
