Toshkent shahrining bosh rejasi yangi bosqichga ko'tarilmoqda. Shahar infratuzilmasini rivojlantirish va aholi uchun qulay sharoitlar yaratish maqsadida umumiy qiymati 16,2 milliard dollarga teng bo'lgan 31 ta yirik loyiha tasdiqlandi. Ushbu o'zgarishlar poytaxt qiyofasini zamonaviy talablar asosida shakllantirishga xizmat qiladi.
Tasdiqlangan dasturga ko'ra, loyihalarning asosiy qismi, ya'ni 28 tasi zamonaviy turar joy majmualari hamda aholiga xizmat ko'rsatish ob'ektlarini barpo etishga qaratilgan. Shuningdek, shaharda 5 ta yangi mehmonxona, 2 ta yirik biznes markazi, savdo va ishbilarmonlik majmualari, zamonaviy tibbiyot markazi hamda talabalar uchun qulay yotoqxonalar qurilishi ko'zda tutilgan.
Shaharsozlik siyosatidagi yangiliklar faqat qurilish bilan cheklanib qolmaydi. Bosh rejaga kiritilgan o'zgartirishlarga binoan, 203 ta hududda renovatsiya, 46 ta hududda rekonstruktsiya hamda 23 ta hududda konservatsiya strategiyalari amalga oshiriladi. Bu chora-tadbirlar poytaxtning tarixiy va zamonaviy qismlarini uyg'unlashtirish hamda shahar hududlaridan samarali foydalanish imkonini beradi.
“Zamin”ni Telegramʻda oʻqing!
