O'zbekiston Respublikasi Prezidenti 2026 yilgi Navro'z umumxalq bayramini munosib kutib olish va uni yuqori saviyada tashkil etish bo'yicha maxsus qaror qabul qildi. Ushbu hujjat mamlakatimizda inson qadri, huquq va manfaatlarini ta'minlash hamda xalqimiz farovonligini oshirish yo'lida amalga oshirilayotgan keng ko'lamli islohotlarning mantiqiy davomi hisoblanadi.
Qarorda ta'kidlanishicha, Navro'z bayrami o'zining insonparvarlik, bag'rikenglik, saxovat va mehr-oqibat kabi azaliy qadriyatlari bilan jamiyatimizda tinchlik hamda hamjihatlik muhitini mustahkamlashda muhim o'rin tutadi. Sharqona yangi yil sifatida nishonlanadigan ushbu sana xalqimizning tarixiy an'analarini asrab-avaylash va yosh avlodga yetkazishda katta ahamiyatga ega.
Hujjatga muvofiq, bayramni ko'tarinki ruhda o'tkazish uchun tegishli vazirlik va idoralarga aniq topshiriqlar berildi. Navro'z tantanalari yurtimizning barcha hududlarida, mahallalarda va ta'lim muassasalarida milliy qadriyatlarimizni ulug'lovchi tadbirlar bilan birgalikda tashkil etilishi rejalashtirilgan. Shuningdek, bayram kunlari ijtimoiy adolat tamoyillarini qaror toptirish, muhtoj insonlarga yordam ko'rsatish va saxovat tadbirlarini o'tkazishga alohida e'tibor qaratiladi.
Navro'z bayramiga tayyorgarlik ko'rish jarayonida xalqimizning boy madaniy merosini namoyish etuvchi ko'rgazmalar, konsert dasturlari va milliy o'yinlar tashkil etilishi ko'zda tutilgan. Bu kabi tadbirlar jamiyatda o'zaro hurmat va mehr-oqibat muhitini yanada yuksaltirishga xizmat qiladi.
“Zamin”ni Telegramʻda oʻqing!
