Foto: government.ru
Rossiya O‘zbekistonga neft va tabiiy gaz yetkazib berish hajmini kengaytirish rejasini maʼlum qildi. Bu haqda Rossiya bosh vaziri Mixail Mishustin ikki davlat hukumat rahbarlari darajasidagi qo‘shma komissiyaning 6-yig‘ilishida bayonot berdi.
Uning aytishicha, tomonlar neft va gaz resurslarini yetkazib berishni davom ettirish hamda bu hajmni bosqichma-bosqich oshirish bo‘yicha kelishuvga erishgan.
«Rossiya nefti va tabiiy gazini yetkazib berishni davom ettiramiz, shu bilan birga hajmni oshirish bo‘yicha kelishuvlarga erishildi», dedi Mishustin O‘zbekiston bosh vaziri Abdulla Aripov bilan uchrashuv chog‘ida.
Energetika — strategik yo‘nalish
Rossiya tomoniga ko‘ra, energetika sohasi ikki davlat hamkorligida eng muhim yo‘nalish sifatida ko‘riladi. Bu faqat eksport bilan cheklanib qolmay, balki infratuzilmani modernizatsiya qilishni ham o‘z ichiga oladi.
Hozirgi kunda rossiyalik mutaxassislar ishtirokida O‘zbekistonda yangi quduqlar qazish, gaz-qayta ishlash tizimlarini yangilash hamda gaz-transport infratuzilmasini takomillashtirish ishlari olib borilmoqda.
Iqtisodiy aloqalar kengaymoqda
Energetika sohasidagi hamkorlik umumiy iqtisodiy munosabatlar o‘sishi bilan uyg‘un kechmoqda. 2025 yilda ikki davlat o‘rtasidagi tovar ayirboshlash hajmi 12,5 foizga oshib, 1 trillion rubl atrofiga yetgan.
Tomonlar 2030 yilga qadar o‘zaro savdo hajmini 30 milliard dollarga yetkazishni maqsad qilgan.
O‘zbekiston bosh vaziri Abdulla Aripov ham energetika sohasidagi hamkorlik izchil rivojlanib borayotganini taʼkidladi. Uning so‘zlariga ko‘ra, Jizzax viloyatida Rossiya ishtirokida qurilayotgan atom elektr stansiyasi loyihasi hamkorlikda yangi bosqichni boshlab bergan.
Kelgusi rejalar
Yig‘ilishda neft va gaz yetkazib berishning aniq miqdorlari ochiqlanmadi. Bu masala hukumatlararo komissiya nazoratida qolmoqda va tomonlar doimiy muloqotda ekani bildirildi.
Yig‘ilish yakunida qo‘shma kommyunike imzolandi. Keyingi yirik muhokama maydoni 2026 yil iyun oyida Toshkentda o‘tadigan xalqaro investitsiya forumi bo‘lishi kutilmoqda.
“Zamin”ni Telegramʻda oʻqing!
