Transferlarga ixtisoslashgan transfermarkt.world portali A Seriya futbolchilarining transfer summalarini yangiladi.
Italiya chempionatining yuqori divizionida yigirmata jamoada 569 nafar futbolchi ro‘yxatdan o‘tkazilgan. Ulardan 63,3 foizi, ya’ni 360 nafari dunyoning oltmish to‘qqizta davlatidan kelgan legionerlardir.
Yangi ko‘rsatkichlarga ko‘ra, ijara asosida “Kalyari” sharafini himoya qilayotgan Eldor Shomurodovning transfer summasi bir million yevroga arzonladi.
Ayni paytda 28 yoshli hujumchimiz besh million yevroga baholanmoqda. Narxning tushishi legionerimizning zaxirada o‘tirib qolayotgani va samarali o‘yin ko‘rsata olmayotgani bilan bog‘liq.
Eldor Shomurodov 2020 yilning oktyabr oyida Rossiya Premer-ligasining “Rostov” klubidan Italiyaning eng qadimiy jamoasi – “Jenoa”ga ko‘chib o‘tganida portal tomonidan 6,5 million yevroga baholangan edi.
Genuya klubidagi muvaffaqiyatli ishtiroki natijasida hamyurtimizning transfer narxi ham ko‘tarilib bordi.
Shomurodov 2021 yilning yozida “Roma”ga ko‘chib o‘tganidan keyin www.transfermarkt.world portali ekspertlari tomonidan oktyabr oyida yangilangan reytingda hamyurtimiz 14 million yevroga baholangan edi. Bu ko‘rsatkich, o‘zbek futboli tarixida eng qimmat narx sifatida qayd etilgan.
Ta’kidlash joizki, Shomurodovning transferini amalga oshirgan Italiya klublari futbolchimiz portalda ko‘rsatilganidan qimmatroq summa sarf qilgan. Eldor Shomurodov “Jenoa”ga umumiy hisobda bonuslar bilan qo‘shib hisoblaganda 9,5 million yevroga tushgan.
Rim klubi esa, o‘zbek futbolchisini qo‘lga kiritish uchun 18 million yevro xarajat qilishiga to‘g‘ri kelgan.
Shunga qaramay, Shomurodovning keyingi uch jamoa – “Roma”, Spetsiya” va “Kalyari”dagi faoliyati kutilgan darajada bo‘lmayapti va bu o‘z-o‘zidan uning transfer narxining muntazam pasayishiga olib kelmoqda.
Transfermarkt portali A Seriyada narxi keskin pasaygan futbolchilar ro‘yxati quyidagicha ko‘rinish oldi:
Nikolo Fadjoli («Yuventus») — € 15 mln (- 20 mln yevro);
Viktor Osimxen («Napoli») — € 110 mln (- 10 mln yevro);
Dushan Vlaxovich («Yuventus») — € 60 mln (- 7 mln yevro);
Daiti Kamada («Latsio») — € 20 mln (- 7 mln yevro);
Xvicha Kvaratsxeliya («Napoli») — € 80 mln (- 5 mln yevro);
Teo Ernandes («Milan») — € 55 mln (- 5 mln yevro);
Stanislav Lobotka («Napoli») — € 35 mln (- 5 mln yevro);
Andre Zambo Angissa («Napoli») — € 35 mln (- 5 mln yevro);
Romelu Lukaku («Roma») — € 35 mln (- 5 mln yevro);
Pyotr Zelinski («Napoli») — € 35 mln (- 5 mln yevro).
“Zamin” yangiliklarini “Twitter”da kuzatib boring
