Husanov fantastik narxga ketadi, xaridor nomi oydinlashib qoldi!

Abduqodir Husanov oʻndan ziyod klub oʻrtasida talash boʻlmoqda. Biroq koʻpchilikni Angliya va Ispaniya chempionatlari – “Manchester Siti” va “Real” oʻrtasida oʻzbek futbolchisi uchun kechayotgan raqobat qiziqtirib turibdi.

Chunki Fransiya, Italiya, Germaniya, Angliya, Ispaniya va Turkiyaning qolgan klublari moliyaviy imkoniyatlar boʻyicha bu klublarga bas kela olmaydi.

Vaziyatni kuzatib borayotgan beritarealmadrid.com sayti Abduqodir Husanov atrofida yuzaga kelgan qizgʻin vaziyatni tahlil qildi.

Oʻzbek futbolchisi hammaning diqqat markazida, “Lans” esa, uning transferi uchun narxni muntazam oshirmoqda. Ayni paytda “Real Madrid” va “Manchester Siti” 20 yoshli markaziy himoyachini qoʻlga kiritish uchun kurash olib boryapti.

“Real”ning Abduqodir Husanov uchun kurashga qoʻshilgani haqidagi xabar juda tez tarqaldi va katta shov-shuvni keltirib chiqardi. Mutaxassislarning ta'kidlashicha, oʻzbek futbolchisi madridliklarning himoya chizigʻini kuchaytirish uchun jiddiy nomzod.

Keyingi bir necha mavsum davomida “Real” orqa chiziqda jarohatlar bilan bogʻliq davomli muammolarga duch kelmoqda. Shu bois, klub Abduqodir Husanovdan tashqari Ispaniya poytaxtida Kastello Lukeba, Vitor Reys va Emerik Laport singari himoyachilarni ham kutyapti.

Husanov Fransiya chempionatida “Lans” safidagi ajoyib oʻyinlari bilan hammaning e'tiborini qozonib kelmoqda. 20 yoshli legioner oʻzining shiddatli va tartibli oʻyin uslubi bilan grand klublar nazariga tushdi.

“Manchester Siti” “ov” boshladi

“Real Madrid” Husanov uchun yagona da'vogar, degan xayolga borib adashmang. Yosh iste'dodlarni faol tarzda oʻz safiga jalb etib keladigan “Manchester Siti” ham oʻzbek futbolchisini olish uchun kurashmoqda.

“Siti”ning oʻzbek futbolchisiga qiziqishi ortib borayotgani “Real”ga bosimni kuchaytirib yuboribdi va madridliklar oldiga tezroq va aniq harakat qilish shartini koʻndalang qoʻymoqda.

Bu ikki gigant klubdan tashqari, “Nyukasl Yunayted” ham oʻyinchi olish boʻyicha maqsadli harakatlarni amalga oshirmoqda. Anchadan beri qiziqish bildirib kelgan “Tottenxem Xotspur” esa, himoyachining narxi koʻtarila boshlagach, sekin ortga chekinayotgani sezilib qoldi.

Husanov fantastik narxga ketadi

Xaridorlarning turnaqator navbatda turgani Abduqodirning transfer summasi keskin oshishiga sabab boʻlyapti. The Athletic nashrining yozishicha, “Lans” oʻz kashfiyotini arzon sotmoqchi emas.

Bugungi kunda frantsiyaliklar transfer uchun 40 million yevrodan ziyodroq badal puli talab qilayotgani aytilmoqda. Bu yosh oʻyinchi uchun fantastik narx.

Superagent Jorje Mendeshga Husanovning savdosidan imkon qadar har tomonlama manfaatli echim topish vazifasi yuklatilgan. Portugaliyalik mutaxassis futbol olamidagi reputatsiyasidan foydalanib, oʻzbek futbolchisi transferida bosh rolni oʻynamoqda.

“Real” Husanovni qachon olmoqchi?

Husanovga turli klublarning qiziqishi oshib borayotganiga qaramay, “Real Madrid” shoshilinch qarorlarni qabul qilmoqchi emas. “Qirollik klubi” qishda transferlarni amalga oshirmasligini ma'lum qilib boʻlgan.

Oʻtgan yili madridliklar xuddi shu tarzda Lekin Yoroni qoʻldan chiqargan edi.

“Real” markaziy himoyachiga ehtiyoj borligini ma'lum qilgan, lekin yanvar oyida yangi oʻyinchi olish uchun katta qadam tashlanmaydi. Garchi madridliklar Husanov vakillari bilan aloqa oʻrnatgan boʻlsa-da, bu transferni yozda amalga oshirmoqchiga oʻxshaydi.

“Real” faoliyatini yoritib borayotgan beritarealmadrid.com saytining yuqoridagi ma'lumotlariga qoʻshimcha tarzda shuni ma'lum qilish kerakki, Abduqodir Husanov katta ehtimol bilan boshqa klubga nasib qiladi.

Chunki mashhur insayder Fabritsio Romano “Manchester Siti” madridliklardan farqli ravishda Abduqodir Husanovni yanvar oyining oʻzidayoq transfer qilishga qaror qilgani va tomonlar oʻrtasidagi muzokaralar ijobiy yakunlanishga yaqin ekanini ma'lum qildi.

Demak, Abduqodir Husanov atrofida yuz berayotgan jarayonlarni kuzatishda davom etamiz. Tez orada legionerimiz faoliyatini qaysi jamoada davom ettirishi oʻz tasdigʻini topadi. “Zamin” yangiliklarini “Telegram”da kuzatib boring