Rossiyalik mashhur murabbiy Husanov va Fayzullayev haqida gapirdi

Rossiya milliy terma jamoasining sobiq bosh murabbiyi Stanislav Cherchesov ayni paytda Qozogʻistonda faoliyat yuritmoqda.

61 yoshli mutaxassis Cherchesov orada, ya'ni 2021-2023 yillar davomida Vengriyaning “Ferensvarosh” jamoasini ham boshqardi.

Mashhur murabbiy Qozogʻiston milliy terma jamoasini oʻtgan yili qabul qilib olgan edi. Biroq uning faoliyati kutilgan darajada chiqmadi va hozir Cherchesov vaziyatni oʻnglashga harakat qilmoqda.

Jurnalistlar bilan suhbatda Stanislav Cherchesov Oʻzbekiston milliy terma jamoasining yosh etakchilari – Abbosbek Fayzullayev va Abduqodir Husanov haqida oʻz fikrlarini bildirdi.

Abbosbek Fayzullayev haqida

Abbosbek Fayzullayev hozir SSKAda yaxshi oʻynayapti. Men “Ferensvarosh”da faoliyat yuritgan vaqtimdayoq klub sport direktoriga Fayzullayevga e'tibor qaratish kerakligini aytgandim.

Lekin oʻshanda ular bu futbolchining xizmatlariga ehtiyoj yoʻqligini ta'kidlashgan.

Abduqodir Husanov haqida

Sizlar Abduqodir Husanov haqida endigina eshitdingiz. Uning transferi millionlarga koʻtarilganidan keyin hamma unga e'tibor qaratdi. Buning uchun katta murabbiy boʻlish shart emas, koʻpgina puling boʻlsa etarli.

Menga Husanov haqidagi ma'lumotlarni Alan Aguzarov yuborgan. Oʻshanda bu himoyachi Belarus chempionatida oʻynardi.

Tabiiyki, men uning salohiyatini koʻrganman. “Manchester Siti”ga futbolchini shunchaki olishmaydi.

Ta'kidlash joizki, Abduqodir Husanov va Abbosbek Fayzullayev Oʻzbekistonning turli yoshdagi terma jamoalarida birga oʻynab kelgan va 2023 yilning yozidan beri har ikki futbolchi milliy terma jamoaga jalb qilib kelinmoqda.

20 yoshli Husanov Oʻzbekiston milliy terma jamoasi safida xalqaro miqyosda 18 ta uchrashuvda ishtirok etib, himoyadagi mustahkam oʻyinlari va yuqori koʻrsatkichlari bilan muxlisu mutaxassislar ishonchini oqlab kelmoqda.

21 yoshli Abbosbek Fayzullayev ham mamlakat bosh jamoasi tarkibida 23 ta bellashuvda maydonga tushib, raqiblar darvozasini etti marta ishgʻol qilgan. “Zamin” yangiliklarini “Telegram”da kuzatib boring