Andrey Fyodorov Abduqodir Husanov va Abbosbek Fayzullayev haqida qanday fikr bildirdi?

Oʻzbekiston milliy terma jamoasi, “Neftchi” va “Rubin” klublari sobiq futbolchisi Andrey Fyodorov bugungi kundagi eng yorqin oʻzbekistonlik oʻyinchilar – Abduqodir Husanov va Abbosbek Fayzullayev haqida oʻz fikrlarini bildirdi.

Abduqodir Husanov haqida

Yosh oʻyinchilarga nisbatan Evropa va Rossiyadagi munosabat bir biridan farq qiladi. Rossiyalik murabbiylar odatda tavakkal qilishga qoʻrqishadi va asosiy tarkibga yosh futbolchilarni koʻp ham jalb qilishmaydi, Evropada esa, bu masala boshqacha hal qilinadi.

Xususan, Abduqodir Husanovni Oʻzbekistonda ham, boshqa ligalarda ham kuzatmaganman. Lekin men uning oʻyinlarini 2023 yili Toshkentda boʻlgan Osiyo kubogida koʻrdim. Buning uchun Oʻzbekistonga atayin borgan edim.

Oʻshanda Rossiyaning koʻplab murabbiylari menga qoʻngʻiroq qilib, Husanov haqidagi fikrlarimni soʻrashgan edi. Ularga u haqida etarli ma'lumotim yoʻqligini aytdim. Shu bois, Oʻzbekistonga borib uning oʻyinini shaxsan koʻrib kelishga qaror qilgandim.

Unga qiziqayotganlar “top-5” ligalari vakillari edi, deya olmayman, lekin Rossiya Premer-ligasi murabbiylari haqiqatan ham u haqida soʻrashgan. Lekin Rossiyadan aniq takliflar boʻlgani yoʻq, Husanov va boshqa oʻyinchilar haqida fikrimni soʻrashgan xolos.

Abbosbek Fayzullayev haqida

Abduqodir Husanovdan keyin Evropaga Abbosbek Fayzullayevning yoʻl olishi masalasi futbolchining vakillari ishiga bogʻliq boʻladi. Oʻzbekiston chempionatida Evropaga ketishi mumkin boʻlgan uning tengqurlari koʻp.

Abbosning oʻziga Ispaniya chempionati juda mos tushadi. Ispaniyada u porlaydi.

Aslida oʻzbek oʻyinchilariga Evropa klublaridan qiziqish boʻlyapti, lekin muammo shundaki, ularning agentlari va vakillari koʻpincha Osiyoda qolish variantini ma'qul koʻrmoqda.

Chunki moliyaviy imkoniyatlar nuqtai nazaridan Osiyoda qolish foydaliroq.

Ta'kidlash joizki, Abduqodir Husanovning “Lans”dagi muvaffaqiyatli faoliyatidan keyin “Manchester Siti”ga koʻchib oʻtgani Evropadagi futbol ekspertlari, murabbiylari, skautlari, mutaxassislari e'tiborini oʻzbek futboliga qaratdi.

Eldor Shomurodov va Abduqodir Husanov oʻzbek futboli tarbiyalanuvchilari ham Evropaning eng kuchli ligalarida toʻp tepa olishini isbotlab kelmoqda. Xususan, yosh avlod vakillaridan Muhammadali Oʻrinboyev oʻtgan yili Angliyaning “Brentford” jamoasida malaka oshirib qaytgan boʻlsa, Lazizbek Mirzayev 2024 yilning dekabr oyida Ispaniyaning “Leganes” klubi bilan shartnoma imzoladi va yoshlar jamoasida mahoratini charhlaydigan boʻldi. “Zamin” yangiliklarini “Telegram”da kuzatib boring