Sergey Fomin Turkiyadagi tennis musobaqasida chempionlikni qo‘lga kiritdi

Turkiyaning Antaliya shahrida o‘tkazilgan xalqaro tennis musobaqasida hamyurtimiz Sergey Fomin yakkalik bellashuvlarida ham zafar quchdi. Bu uning xalqaro tennis arenasidagi navbatdagi muvaffaqiyati bo‘ldi.

Mamlakatimiz sharafini himoya qilayotgan Sergey Fomin musobaqaning yakkalik finalida Ruminiya vakili Gabriel Getuga qarshi kortga chiqdi. Qizg‘in va murosasiz kechgan bahsda Fomin o‘z mahorat va irodasini namoyon etib, 6:7, 6:4, 6:1 hisobida g‘alaba qozondi. Ushbu muvaffaqiyat uchun u 2160 AQSH dollari miqdoridagi pul mukofoti hamda 15 reyting ochkosini qo‘lga kiritdi.

E’tiborli jihati, Sergey Fomin musobaqaning juftlik bahslarida ham zafar quchgan edi. U neytral maqomdagi tennischi Daniil Golubev bilan juftlikda ishtirok etib, ushbu yo‘nalishda ham bosh sovringa ega chiqdi.

Tennis muxlislari uchun quvonchli yangiliklar bundan iborat emas. Joriy haftada ham Sergey Fomin Antaliya shahrida davom etadigan M25 tasnifiga kiruvchi xalqaro turnirda qatnashadi. Ushbu musobaqada uning ilk raqibi Germaniya vakili Tom Gench bo‘lishi kutilmoqda.

Hamyurtimizning keyingi bellashuvlarida ham muvaffaqiyat qozonishiga va o‘zining yuqori natijalarini davom ettirishiga ishonch bildirib qolamiz. “Zamin” yangiliklarini “Telegram”da kuzatib boring