Flik: «Lamin Yamal Messi va Ronaldu darajasiga chiqishi mumkin, lekin...»

“Barselona” bosh murabbiyi Xans-Diter Flik jamoaning yosh yulduzi, 17 yoshli Lamin Yamal haqida o‘z fikrlarini bildirib o‘tdi. Germaniyalik mutaxassis kataloniyaliklarning asosiy tarkibida yorqin o‘yin ko‘rsatib kelayotgan futbolchi kelajakda Lionel Messi va Krishtianu Ronaldu darajasiga ko‘tarilishi uchun nimalarga ahamiyat qaratishi lozimligini tushuntirib berdi.

“Agar sen yuqori saviyada o‘ynashga qodir bo‘lsang, avvalo, shu darajani saqlab qolishni ham bilishing zarur. Bitta alohida o‘yinda ajoyib ko‘rinish ko‘rsatib qo‘yishning o‘zi yetarli emas. Lamin buni juda yaxshi tushunadi va biladi”, – deya ta’kidladi Flik.

Murabbiyning qayd etishicha, yosh futbolchi faqatgina tabiiy iqtidorga tayanib qolmasligi, balki mashg‘ulotlarda jiddiy va muntazam ishlashi kerak.

“Lamin Yamal o‘zining yuqori salohiyatiga faqatgina ishonch bildirib qolmasligi kerak. U o‘z ustida ko‘proq ishlashi, o‘z mahoratlarini muntazam rivojlantirib borishi lozim. Messi va Ronaldu kabi jahon darajasidagi futbolchilar qatoriga qo‘shilishni istasa, nafaqat mehnat qilish, balki ichki xotirjamlikni ham saqlash muhimdir”, – deya tushuntirdi “Barselona” bosh murabbiyi.

Xans-Diter Flikning fikricha, Yamal hozirda yosh bo‘lishiga qaramasdan yuqori saviyada o‘ynayotganidan mamnun bo‘lish lozim, ammo bundan ortig‘iga intilish kerakligi ham unutilmasligi shart.

“Biz, albatta, Laminning yoshligidanoq yuqori saviyada harakat qilayotganidan mamnunmiz. Lekin u hozirgi holati bilan kifoyalanib qolmasligi, yanada yuqori natijalarga erishishi uchun harakat qilishi lozimligini ham tushunib turishi kerak. Uni yosh ekanligini hisobga olsak, oldida katta yo‘l turibdi va bu yo‘ldagi eng muhim narsa – tinimsiz mehnatdir”, – dedi Xans-Diter Flik. “Zamin”ni Telegramʻda oʻqing!