Anvar G‘ofurov: BAAni yengsak tarixiy orzu amalga oshadi!

O‘zbekiston milliy terma jamoasi 5 iyun kuni mehmonda BAAga qarshi juda muhim va mas’uliyatli uchrashuvda maydonga tushadi. Bu o‘yin faqatgina navbatdagi o‘yin emas, balki o‘zbek futboli tarixi uchun yangi sahifa ochuvchi uchrashuvdir. Agar terma jamoamiz BAAga qarshi kerakli natijaga erisha olsa, ilk bor jahon chempionati yo‘llanmasini muddatidan avval qo‘lga kiritadi. Shu sababdan ham bu o‘yinga muxlislar, mutaxassislar va butun xalqimizning diqqati qaratilgan.

Terma jamoamizning sobiq futbolchisi va murabbiy sifatida ham faoliyat olib borgan Anvar G‘ofurov muhim bahs oldidan o‘zining fikr-mulohazalarini bildirdi va jurnalistlarning savollariga javob qaytardi.

— Anvar aka, BAAga qarshi bo‘lajak o‘yin haqida fikrlaringiz qanday? Bu uchrashuv biz uchun qanchalik muhim?

— Shubhasiz, bu o‘yin biz uchun juda katta ahamiyatga ega. Hammamiz yaxshi bilamizki, BAA ustidan g‘alaba qozonish yoki kerakli natijaga erishish biz uchun jahon chempionati eshiklarini ochadi. Men terma jamoamizni bu bahsda favorit sifatida ko‘ryapman va 100 foiz ishonch bildiraman. Futbolchilarimizga va murabbiylar shtabiga to‘liq ishonaman, nasib qilsa, biz yillar davomida orzu qilgan kun nihoyat keladi va xalqimizning quvonchiga sabab bo‘ladi.

— Ma’lum bo‘lishicha, BAA terma jamoasida murabbiy o‘zgargan. Bu biz uchun qanday ta’sir qilishi mumkin deb o‘ylaysiz?

— Murabbiy o‘zgarishi futbolchilarda ma’lum bir miqdorda tushunmovchilik va noqulaylik yuzaga keltirishi mumkin. Lekin men ishonamanki, bizning murabbiylar shtabi vaziyatni tezda tahlil qilib, kerakli ko‘rsatmalarni beradi. Bu borada biz juda kuchli va tajribali murabbiylarga egamiz. Shuningdek, futbolchilarimiz ham har qanday kutilmagan holatlarga tayyor. Biz raqibdan har taraflama ustunmiz deb o‘ylayman.

— Siz bir vaqtlar terma jamoada futbolchi sifatida o‘ynagansiz va murabbiy sifatida ham faoliyat yuritgansiz. Hozirgi tarkibga qanday qaraysiz: optimalmi yoki yana kimdir qo‘shilsa bo‘larmidi?

— Ayni damdagi terma jamoa tarkibi eng optimal va kuchli deb hisoblayman. Bu tarkibning eng katta ijobiy tomoni – futbolchilar o‘rtasidagi kuchli va sog‘lom raqobatdir. Albatta, yana bir nechta yaxshi futbolchini qo‘shish orqali tarkibni ideal darajaga chiqarish mumkin, lekin hozirgi holatdagi tarkib ham bizga zarur bo‘lgan natijani olib kelishi mumkinligini tasdiqlay olaman.

— BAA terma jamoasining kuchli va kuchsiz tomonlarini qanday baholaysiz?

— Agar BAA futbolchilari ikkinchi raqamda yopiq va himoyaviy taktika bilan maydonga chiqishsa, bu bizga ozgina qiyinchilik tug‘dirishi mumkin. Biroq, agar raqibimiz ochiq futbol o‘ynashga qaror qilsa, bu biz uchun katta afzallik bo‘lib, natijaga erishishimiz osonlashadi. BAA terma jamoasiga katta hurmat bilan qarayman, ammo ikki jamoa imkoniyatlarini solishtirganda, biz ustunroqmiz va bu o‘yinda g‘alaba qozonishimizga ishonaman.

— Shaxsan sizda o‘yin oldidan xavotir bormi? Hakamlik yoki boshqa tomonlardan xavf ko‘rmayapsizmi?

— Menda hech qanday xavotir yo‘q. Chunki terma jamoamizning imkoniyatlari, futbolchilarimizning jismoniy va psixologik holatiga ishonaman. Hakamlik yoki boshqa omillar bizning jamoamizning yuqori saviyali o‘yiniga xalaqit bermasligi kerak va berolmaydi ham. Ishonchim komilki, biz shu safar o‘z orzuimizni ro‘yobga chiqarib, jahon chempionati yo‘llanmasini olamiz.

Xulosa qilib aytganda, Anvar G‘ofurovning so‘zlaridan ham ko‘rinib turibdiki, O‘zbekiston milliy terma jamoasida ruhiy va jismoniy tayyorgarlik yuqori darajada. Bu jamoamizga BAAga qarshi o‘yinda kerakli natijani olish uchun katta imkoniyat beradi. Butun O‘zbekiston xalqining umidi va orzusi shu uchrashuvga qaratilib, barchamiz vakillarimizdan faqatgina g‘alaba kutayapmiz. Terma jamoamizga omad tilaymiz va tarixiy orzuimizning amalga oshishiga ishonamiz! “Zamin”ni Telegramʻda oʻqing!