"Barselona" transferlari va moliyaviy muammo: La Liga rahbaridan ochiq izoh

Oldindagi yangi mavsum arafasida “Barselona” klubi o‘z transfer faolligi bilan yana futbol olami diqqat markazida turibdi. Ammo kataloniyaliklar transferlar haqidagi shov-shuvli xabarlar bilan birga moliyaviy cheklovlar to‘sig‘iga duch kelgan. La Liga prezidenti Xaver Tebasning so‘zlariga ko‘ra, klub bir necha muhim kelishuvlarga erishgan bo‘lsa-da, hali-hamon yangi o‘yinchilarni rasman ro‘yxatdan o‘tkazish imkoniyatiga ega emas.

Tebas ESPN nashriga bergan intervyusida: “Transfer haqida e’lon qilish – bu bir narsa, o‘yinchini rasman ro‘yxatdan o‘tkazish esa butunlay boshqa jarayon. Barselona 1:1 moliyaviy qoidasiga amal qilishi va mavjud me’yorlarni buzmasligi shart”, — deya ta’kidladi.

Ma’lumki, “Barsa” yaqinda “Espanol” darvozaboni Joan Garsiyani 25 million yevroga xarid qilish huquqini ishga tushirdi va “Atletik” jamoasidan Niko Uilyams bilan og‘zaki kelishuvga erishdi. Biroq, bu bitimlarning amalga oshishi uchun klub moliyaviy feyr-pley talablariga rioya qilishi zarur.

Xaver Tebas ayni paytda Joan Garsiya bilan bog‘liq jarayon nisbatan oson kechishini va klub rahbariyati bu borada yetarlicha tajribaga ega ekanini qo‘shimcha qildi.

Kataloniyaliklar ayni paytda faqat transfer siyosati bilan emas, balki moliyaviy barqarorlikni saqlash uchun ham jiddiy harakat qilmoqda. Chunki La Liga qo‘ygan talablar va cheklovlar "Barselona" kabi klublar uchun katta mas’uliyat yuklamoqda. Muxlislar esa, albatta, yozgi transferlar va yangi futbolchilarni maydonda ko‘rishni kutayotgan paytda, klub rahbariyati hali oldida moliyaviy sinovlar turibdi.

"Barselona"ning yozgi transferlariga moliyaviy cheklovlar qanday ta’sir ko‘rsatadi?

Katta umidlar, yangi keluvchilar va murakkab qoidalar fonida klubni qiyin qarorlar kutmoqda. Mavsum oldidan kataloniyaliklar o‘z moliyaviy vaziyatlarini mustahkamlashi va La Liga qoidalariga mos ravishda transferlarni rasmiylashtirishi lozim bo‘ladi.

Muxlislar esa klub rahbariyatidan amaliy natijalar va kuchli tarkib kutmoqda – yozgi transferlar "Barsa"ni yana yuqoriga olib chiqadimi? “Zamin”ni Telegramʻda oʻqing!