Bernardu Silva "Al-Hilol"ga qarshi o‘yindagi dramatik mag‘lubiyat haqida nimalar dedi?

Klublar o‘rtasidagi Jahon chempionati 1/8 finalida "Manchester Siti" va "Al-Hilol" jamoalari o‘rtasida bo‘lib o‘tgan dramatik uchrashuv futbol muhlislari yodida uzoq qoladigan bo‘ldi. Hisob 3:4 – saudiyaliklar g‘alabasi bilan yakunlandi, deb yozadi mancity.com. Ushbu o‘yinda asosiy vaqtda 2:2 hisobi qayd etildi, qo‘shimcha daqiqalarda esa inglizlar mag‘lub bo‘ldi.

Uchrashuvdan so‘ng "Manchester Siti" yarim himoyachisi Bernardu Silva jamoaning mag‘lubiyat sabablari haqida samimiy fikrlari bilan bo‘lishdi. Uning ta’kidlashicha, jamoada ayrim pallalarda to‘pni yo‘qotganda yetarlicha konsentratsiya va tashkilotchilik yetmagan: "Uchta gol urdik, ammo yana bir necha bor aniq zarba bilan gol kiritish mumkin edi. Hujumda imkoniyatlarimiz yetarlicha bo‘ldi, afsuski, vaziyatlardan to‘liq foydalana olmadik".

Silva o‘yindagi eng katta muammo sifatida himoyadagi tizim va raqibga qarshi hujumlardagi yetarlicha tayyorgarlikning yo‘qligini qayd etdi: "Qachonki raqibga tezkor qarshihujumlar o‘tkazishga imkon bersak, aynan shunday qiyinchiliklar yuzaga keladi. Bugun buning yorqin namunasi bo‘ldi. Raqib har bir xatomizni jiddiy jazoladi".

Uning fikricha, jamoa chorak finalga chiqish, katta natijalarga erishishni istagan, lekin futbolda hamma narsa faqat rejaga bog‘liq emas: "Maqsadlarimiz katta edi, afsuski, ba’zi vaziyatlarni nazorat qilishni uddalay olmadik. Futbolda shunday paytlar bo‘ladi — buni qabul qilishimizga to‘g‘ri keladi".

Bernardu Silva mag‘lubiyatga qaramay raqibni ham munosib tarzda tabrikladi: "Al-Hilol” yaxshi jamoa ekan, bizga ko‘p muammolar tug‘dirishdi va g‘alabaga haqli bo‘lishdi".

Muxlislar esa ushbu dramatik o‘yindan keyin “Siti” o‘z xatolarini tahlil qila olishi va kelgusida yana kuchliroq jamoa sifatida maydonga qaytishiga ishonch bildirishmoqda. Chempionatdagi har bir uchrashuv, hatto mag‘lubiyat ham, katta saboq va tajriba ekanligi yana bir bor isbotlandi. “Zamin”ni Telegramʻda oʻqing!