Kojo Superligaga qaytdi: “Neftchi” yangi hujumchi bilan kuchayadi

Qirg‘iz Respublikasi hamda Eronning “Istiqlol” klubi safida to‘p surgan tajribali hujumchi Joel Kojo yana O‘zbekiston Superligasiga qaytdi. Uning agenti orqali tarqalgan ma’lumotlarga ko‘ra, futbolchi kecha Erondan O‘zbekistonga yetib kelgan va tez orada yangi klub bilan shartnoma imzolashini ma’lum qilgan edi.

Endilikda aniq ma’lum — Kojo o‘z faoliyatini Farg‘onaning “Neftchi” klubida davom ettiradi. Manbalarga ko‘ra, unga Qarshining “Nasaf” jamoasi ham qiziqish bildirgan, ammo futbolchi “Neftchi”ning loyihasiga ko‘proq ishongan va shu variantni ma’qul ko‘rgan.

Joel Kojo O‘zbekiston futboli muxlislariga begona emas — u avval “Dinamo” jamoasi safida ikki mavsum to‘p surib, o‘zini samarali va harakatchan hujumchi sifatida ko‘rsata olgan. Uning Superligaga qaytishi “Neftchi” hujum chizig‘ini mustahkamlashda muhim ahamiyat kasb etishi mumkin.

Ayni paytda farg‘onaliklar chempionatning ikkinchi yarmiga jiddiy tayyorgarlik ko‘rmoqda. Yangi transfer esa jamoa muxlislari uchun ham kutilgan yangilik bo‘ldi.

Siz nima deb o‘ylaysiz — Kojo “Neftchi” safida yana yuqori darajada to‘p sura oladimi? “Zamin”ni Telegramʻda oʻqing!