So‘nggi kunlarda Saudiya Arabistonining Ar-Riyod shahrida eng yirik kibersport shaxmat musobaqalaridan biri – umumiy mukofot jamg‘armasi 1 million 550 ming dollar bo‘lgan "Esports World Cup Chess" chempionati bo‘lib o‘tmoqda. Bu musobaqa dunyoning yetakchi grossmeysterlari, mashhur shaxmatchilar va yosh iqtidorlarni bir maydonda to‘pladi.
O‘zbekiston sharafini himoya qilgan Nodirbek Abdusattorov chorak final bosqichida Fransiyaning iqtidorli shaxmatchisi, "Grand Swiss 2021" g‘olibi Alireza Firuzjaga qarshi maydonga tushdi. O‘ta keskin va ruhiy bosim ostida o‘tgan bellashuvda, afsuski, birinchi partiyada Nodirbekda vaqt tanqisligi o‘z ta’sirini ko‘rsatdi va imkoniyatdan mahrum bo‘ldi. Ikkinchi partiyada esa yo‘l qo‘yilgan katta xatolik uni yarim final yo‘llanmasidan mahrum qildi.
Ma’lumot uchun, ushbu nufuzli chempionatda yana bir o‘zbekistonlik iqtidor Javohir Sindarov ham ishtirok etgan edi. Ajalga qarshi kurashda Sindarov guruh bosqichida ikki marta mag‘lubiyatga uchrab, musobaqa bilan erta xayrlashdi.
Shu tariqa, Nodirbek Abdusattorov ham musobaqadagi g‘alabali yurishini to‘xtatdi. Biroq, 20 yoshli grossmeysterimiz umumiy natijalar bo‘yicha TOP-8 shaxmatchi qatoridan o‘rin oldi va musobaqa tashkilotchilari tomonidan belgilangan 85 ming AQSH dollari miqdoridagi mukofotga ega bo‘ldi. Javohir Sindarov esa chempionatda 13-o‘rinni egallab, 50 ming AQSH dollari miqdoridagi mukofotga sazovor bo‘ldi.
Musobaqa davomida o‘zbek shaxmatchilari yuqori darajadagi raqobatga bardosh berib, jahon elitasi orasida o‘z nomini yana bir bor keng jamoatchilikka tanitdi. Bu natijalar nafaqat shaxmat sportida, balki umumiy o‘zbek sportchilari uchun ham ilhom manbai bo‘lib qolishi aniq. Yaqinlashib kelayotgan yangi turnirlarda Nodirbek Abdusattorov va Javohir Sindarovdan yana ko‘p g‘alabalar va yorqin natijalar kutilyapti.
