Gvardiola alamli mag‘lubiyatdan keyin nimalar dedi?

Angliya Premer-ligasining yangi mavsumida «Manchester Siti»ning tayyorgarligi jiddiy muhokamalarga sabab bo‘lmoqda. Ilk turda «shaharliklar»ning «Vulverxempton»ni 4:0 hisobida tor-mor qilishi katta e’tibor qozongan va ko‘pchilik Gvardiola jamoasi yana hammani ortda qoldiradi, degan fikrga kelgandi.

Biroq keyingi turda vaziyat tubdan o‘zgardi. «Tottenhem» Manchesterdan 2:0 hisobida g‘alaba bilan qaytdi. Uchinchi turda esa Gvardiola shogirdlari o‘z kuchini yana bir bor isbotlash imkoniga ega edi.

«Brayton» maydonidagi bahsda mehmonlar dastlabki bo‘limda to‘liq ustunlikka ega bo‘lishdi. Biroq ko‘plab imkoniyatlardan faqat bittasi golga aylandi — Erling Xoland o‘zining to‘rtinchi urinishini aniq yo‘lladi.

Ikkinchi bo‘limda esa vaziyat keskin o‘zgardi. Endi maydon egalari tashabbusni qo‘lga olib, penalti orqali hisobni tenglashtirishdi va o‘yin yakunlanishi arafasida g‘alaba to‘pini ham urdi.

Biz uchun muhim jihati, hamyurtimiz Abduqodir Husanov 85 daqiqa maydonda harakat qildi va birorta xatoga yo‘l qo‘ymadi. Eng qizig‘i, «Brayton»ning ikkinchi goli aynan u zaxiraga olinganidan so‘ng kiritildi.

Uchrashuvdan keyin Xosep Gvardiola jamoa o‘yini haqida fikr bildirdi:

— Men ko‘p narsadan mamnunman. «Tottenhem»ga qarshi uchrashuvni ham yaxshi boshlagan edik, bu gal ham shunday bo‘ldi. Biroq g‘alabaga erisholmadik. Gol o‘tkazib yuborgunga qadar barcha ishlarimiz yaxshi kechayotgandi. Imkoniyatlarimiz ham bo‘ldi, bir soat juda yuqori darajada harakat qildik. Ammo qolgan vaqtda to‘liq yo‘qolib qoldik. Yaqin paslar o‘rniga uzoq to‘plar bilan hujum qilishga urinish jamoaga yordam bermadi. Bu borada hali ko‘p ish qilishimiz kerak.

Mutaxassis shuningdek, mavsum hali yangi boshlanganini va sovrinlar uchun kurashish haqida gapirish erta ekanini ta’kidladi.

«Manchester Siti» o‘zining navbatdagi uchrashuvini 13-sentyabr kuni o‘z maydonida «Manchester Yunayted»ga qarshi o‘tkazadi.