«Neftchi» Jizzaxda muhim g‘alaba qozonib, «Nasaf»ga yaqinlashdi

O‘zbekiston chempionatida 23-tur bahslari yakunlandi va unda chempionlik uchun kurashayotgan Farg‘onaning «Neftchi» klubi muxlislar kutganidek, muhim g‘alabaga erishdi. Jizzaxda mahalliy «So‘g‘diyona»ga qarshi kechgan bellashuvda mehmonlar 0:1 hisobida zafar quchib, turning asosiy voqealaridan birini qayd etishdi.

Uchrashuvda hisobni 38-daqiqada tajribali yarim himoyachi Jamshid Iskanderov ochdi. Uning aniq zarbasi nafaqat g‘alabani ta’minladi, balki Farg‘ona klubining mamlakat yuqori divizionidagi 1700-golini qayd etishi bilan ham tarixiy ahamiyat kasb etdi.

Birinchi taymda «Neftchi» tashabbusni qo‘lga oldi va bir qator hujumlar orqali raqib himoyasini sindirdi. «So‘g‘diyona» esa asosan qarshi hujumlar bilan javob qaytarishga urindi. Biroq mehmonlar gol urish imkoniyatini qo‘ldan boy bermadi va hisobni ochgan zarba butun o‘yin taqdirini hal qildi.

Ikkinchi bo‘limda Jizzax klubi hisobni tenglashtirish uchun bor imkoniyatni ishga soldi. Lyupcho Doriyev faol harakat qildi, ammo uning zarbalari darvoza to‘rini topmadi. Murabbiy Ivan Boshkovich qator almashinuvlar orqali hujumni kuchaytirishga urinib ko‘rdi, ammo bundan naf chiqmadi.

«Neftchi» esa hisobni saqlash bilan cheklanib qolmadi, bir necha marotaba ikkinchi gol urish imkoniyatiga ham ega bo‘ldi. Ammo Farrux Sayfiyev va Joel Kojo yaratgan vaziyatlar yakuniga yetmay qoldi.

Bu g‘alabadan so‘ng «Neftchi» ochkolar sonini 48 taga yetkazdi va turnir jadvalida ikkinchi o‘rinni saqlab qoldi. Ular peshqadam «Nasaf» bilan farqni to‘rt ochkogacha qisqartirishdi. Bu esa chempionlik uchun kurash yanada qizg‘in tus olishiga olib kelmoqda.

«So‘g‘diyona» esa 25 ochko bilan 9-o‘rinda qoldi. Jamoa pastki qismdagi raqobatdan uzoqlashish uchun keyingi turlarda ko‘proq ochko to‘plashi shart.

Gol: Jamshid Iskanderov (38).

So‘g‘diyona: Mitrovich, Jo‘raboyev (Qobilov, 27), Izzatov (Andreev, 80), Mavlonqulov (Hebay, 61), Abdurahmonov (Mustafoqulov, 80), Ivanovich, Doriyev, Qahramonov, Soyibov, Rahmonov, Jaloliddinov.

Neftchi: Ergashev, Siger, Aliboyev (G‘ulomov, 90+2), Ismoilov, Kojo (Ne’matjonov, 90+2), Iskanderov (Odilov, 81), Ro‘ziyev (Yovovich, 72), G‘ofurov, Ubaydullayev, Jokich, Sayfiyev.

Ogohlantirish: Ivanovich (84).