Angliya Premer-ligasi sentyabr oyining eng yaxshi murabbiyini e’lon qildi. Bu mukofot “Kristal Pelas” bosh murabbiyi Oliver Glasnerga nasib etdi.
Glasner sovrin uchun kurashda bir qator mashhur mutaxassislarni — “Manchester Siti” bosh murabbiyi Xosep Gvardiola, “Arsenal” rahbari Mikel Arteta hamda “Brayton” ustozi Roje le Brizni ortida qoldirdi.
Avstriyalik mutaxassisning jamoasi sentyabr oyida uchta o‘yinda 7 ochko to‘plashga muvaffaq bo‘ldi. “Kristal Pelas” “Sanderlend” bilan 0:0 hisobida durang o‘ynagan bo‘lsa, keyingi ikki uchrashuvda “Vest Xem” va “Liverpul” ustidan 2:1 hisobida g‘alaba qozondi.
Bu natijalar klub uchun juda muhim ahamiyat kasb etdi, chunki mavsum boshida jamoa pastki o‘rinlarda borgan bo‘lsa, Glasnerning taktik o‘zgarishlari natijasida jadvalda yuqorilay boshladi.
Hozirgi kunda “Kristal Pelas” APL jadvalida 12 ochko bilan oltinchi o‘rinni egallab turibdi. Mutaxassisning jamoasi nafaqat natija, balki o‘yin uslubi bilan ham muxlislar e’tiborini qozonmoqda.
Tahlilchilar fikricha, Oliver Glasner jamoada intizom va ruhiy barqarorlikni mustahkamlab, “Kristal Pelas”ni Premer-ligada sezilarli kuchga aylantira oldi. Uning muvaffaqiyati nafaqat jamoa ixlosmandlari, balki butun liga tomonidan ham e’tirof etildi.
Shu tariqa, Glasner sentyabr oyining eng yaxshi murabbiyi sifatida Premer-liga tarixida o‘z nomini yozib qo‘ydi.
“Zamin”ni Telegramʻda oʻqing!
