2026 yilda AQSh, Kanada va Meksika hamkorligida oʻtkaziladigan jahon chempionatida Oʻzbekiston milliy terma jamoasi Markaziy Osiyodan ishtirok etadigan yagona jamoa boʻladi, deb yozdi FIFA.com.
Oktyabr oyidagi FIFA kunlarida futbol ishqibozlari qoʻshni Qozogʻiston terma jamoasining ham mundialga chiqish ehtimolini qiziqish bilan kuzatgan edi. Qozogʻistonlik futbolchilar tarixda ilk bor jahon chempionati yoʻllanmasi uchun kurash olib bordi, biroq omad yetmadi.
Bosh murabbiy Talgat Baysufinov shogirdlari Yevropa mintaqasi saralash musobaqasi “J” guruhida Shimoliy Makedoniyaga qarshi safar oʻyinini 1:1 hisobida yakunladi. Bu natija sensatsion boʻlgani bilan, yoʻqotilgan ikki ochko qozoqlarni mundial yoʻllanmasidan mahrum etdi.
Qozogʻiston ushbu guruhda Belgiya, Uels va Shimoliy Makedoniya kabi kuchli raqiblarga qarshi bahs olib bordi. Ular Lixtenshteynni ikki marta (2:0 va 4:0) yenggan boʻlsalar-da, Belgiya (0:6), Uels (1:3 va 0:1) hamda Shimoliy Makedoniyaga (0:1) qarshi oʻyinlarda ochko yoʻqotdi.
Shuning uchun ham oxirgi turdagi durang qozoq jamoasiga kutilgan imkoniyatni bermadi. Endi Baysufinov shogirdlari 15 noyabr kuni saralashning soʻnggi uchrashuvida peshqadam Belgiya bilan oʻz maydonida bellashadi.
Shunday qilib, Oʻzbekiston milliy terma jamoasi 2026 yilgi mundialda Markaziy Osiyoning yagona vakilligi sifatida maydonga tushadi. Bu nafaqat futbolchilar, balki butun mintaqa uchun gʻururli va masʼuliyatli lahza boʻladi.
Bu natija Oʻzbekiston futboli uchun yangi tarixiy bosqichni anglatadi — endi jamoa nafaqat mamlakat, balki butun Markaziy Osiyo sharafini himoya qiladi.
“Zamin”ni Telegramʻda oʻqing!
