"Manchester Siti" bosh murabbiyi Pep Gvardiola Angliya premer-ligasining 8-turida "Everton"ga qarshi oʻyin oldidan jurnalistlar bilan suhbatda jamoa tarkibi va ketgan futbolchilar haqida fikr bildirdi. Ispaniyalik mutaxassis Xulian Alvares va Aymerik Laport kabi sobiq shogirdlarini eslatib, ularning qarorini tushunganini aytdi.
“Trebblni qoʻlga kiritganimizda, zaxiramizda kimlar bor edi, eslaysizmi? Albatta, Aymerik Laport, Xulian Alvares va boshqalar. Men ularni jamoada saqlab qolishni xohlagan boʻlardim, ammo ular koʻproq oʻyin amaliyotini istashdi. Bu yerda esa raqobat kuchli edi, shuning uchun ketishdi”, — dedi Gvardiola.
Murabbiy hozir “Atletiko” safida oʻynayotgan Alvares haqida ham alohida toʻxtaldi: “Xulian yuqori darajadagi futbolchi. Shu bois u hozir dunyoning eng yaxshi klublaridan biri — ‘Atletiko Madrid’da, top murabbiy qoʻl ostida oʻynayapti. Balki men uni hanuz bu yerda, ‘Siti’da koʻrishni istardim, lekin uning qarorini toʻliq tushunaman.”
Gvardiolaga koʻra, “Manchester Siti”da har bir futbolchi uchun raqobat juda kuchli, va bu holat baʼzan futbolchilarni boshqa jamoaga oʻtishga undaydi. “Bu futbolning tabiiy qismi. Baʼzan inson faoliyatida yangi bosqichga oʻtish kerak boʻladi. Biz ularni faxr bilan kuzatdik,” — dedi murabbiy.
Eslatib oʻtamiz, bugun, 18 oktyabr kuni soat 19:00 da “Manchester Siti” oʻz maydonida “Everton”ni qabul qiladi. Gvardiola jamoasi uch ochko olish orqali turnir jadvalida yuqoriroq pogʻonaga koʻtarilishni maqsad qilgan.
“Zamin”ni Telegramʻda oʻqing!
