Xalqaro futbol federatsiyasi (FIFA) 2026 yilgi jahon chempionati boshlanishidan oldin ofsayd qoidasini yangicha tahrirda qabul qilish masalasini muhokama qilmoqda, deb xabar berdi Cardena SER.
Hozirgi amaldagi tartibga ko‘ra, hujumchi to‘p uzatilayotgan paytda uning gol urish mumkin bo‘lgan tanasining istalgan qismi oxirgi ikki himoyachi (darvozabon ham shular jumlasidan)dan oldinda bo‘lsa, o‘yindan tashqari holat qayd etiladi.
Biroq FIFAda bu qoidani yengillashtirish taklifi ko‘rib chiqilmoqda. Londonning “Arsenal” klubi sobiq bosh murabbiyi va hozirda FIFAning global futbolni rivojlantirish bo‘limi rahbari Arsen Vengerning taklifiga ko‘ra, agar hujumchi tanasining hech bo‘lmaganda bir qismi oxirgi himoyachi chizig‘ida yoki undan orqada bo‘lsa, ofsayd hisoblanmaydi.
Bu taklif hozir Xalqaro futbol assotsiatsiyalari kengashi (IFAB) tomonidan o‘rganilmoqda. Qoidani o‘zgartirish masalasi bo‘yicha ovoz berish 2026-yil 1-mart kuni o‘tkazilishi rejalashtirilgan.
2026 yilgi jahon chempionati 11-iyundan 19-iyulgacha AQSH, Meksika va Kanadada bo‘lib o‘tadi. Musobaqada ilk bor 48 ta terma jamoa ishtirok etadi.
Mutasaddilarning fikricha, Venger taklifi amalga oshirilsa, hujumkor futbol kuchayadi va bahsli ofsayd qarorlari soni ancha kamayadi.
“Zamin”ni Telegramʻda oʻqing!
