Madridning “Real” klubida ichki muhitda kichik kelishmovchilik yuzaga kelgani haqida ESPN xabar tarqatdi. Manbaga ko‘ra, jamoa bosh murabbiyi Xabi Alonso va braziliyalik vinger Vinisius Junior o‘rtasidagi munosabatlar so‘nggi o‘yindan keyin sovuqlashgan.
Ma’lumotlarga ko‘ra, Ispaniya chempionatining 10-turida “Barselona”ga qarshi bo‘lib o‘tgan “El-Klasiko”da Vinisius o‘yinning ikkinchi bo‘limida zaxiraga olingan. Bu qaror futbolchini juda asabiy holatga solgan — u maydonni tark etayotganda jamoa murabbiyiga qo‘l bermagan va o‘z o‘rniga ketarkan, qattiq norozilik bildirgan.
Uchrashuvdan keyin “qaymoqranglilar” g‘alaba qozongan bo‘lsa-da, braziliyalik futbolchi vaziyatni og‘ir qabul qilgani ma’lum bo‘ldi. ESPNning yozishicha, shu voqeadan so‘ng Alonso va Vinisius o‘rtasida munosabatlar ancha muzlab qolgan.
Manbalarning ta’kidlashicha, Vinisius bu masala yuzasidan avval jamoadoshlari bilan gaplashib oladi, shundan so‘nggina shaxsan murabbiy bilan suhbat qurishni rejalashtirgan. Bu jarayon jamoa ichidagi muhitni barqaror saqlash uchun ham muhim ahamiyatga ega bo‘ladi.
Xabi Alonso esa o‘ziga xos uslubi bilan har bir futbolchidan intizom va taktik intilish talab etadi. Shu sabab Vinisiusning bu reaksiyasi klub ichida katta mojaroga aylanmagan bo‘lsa-da, murabbiy unga nisbatan so‘zsiz intizomiy yondashuvni saqlab qolishi kutilmoqda.
Shu bilan birga, “Real”dagi boshqa futbolchilar bu vaziyatni ortiqcha bo‘rttirmaslik tarafdori. Ular fikricha, Vinisiusning reaksiyasi jamoa g‘alabasi fonida shunchaki hissiy portlash bo‘lgan, chunki braziliyalik hujumchi har doim o‘yinda faollik va jamoa uchun qayg‘urish bilan ajralib turadi.
Aytish joizki, Vinisius Junior so‘nggi mavsumlarda “Real”ning eng muhim figuralaridan biriga aylangan. Uning tezkorligi va individual mahoratlari ko‘plab muhim bahslarda jamoani qutqarib qolgan. Shu bois Alonso uning ruhiy holatiga jiddiy e’tibor berishi kerakligi ta’kidlanmoqda.
Klub ichidagi manbalar xabar berishicha, Vinisius va Alonso o‘rtasidagi suhbat yaqin kunlarda bo‘lib o‘tadi. Maqsad — vaziyatni tinch yo‘l bilan hal etish va jamoa ichidagi ruhiy barqarorlikni saqlash.
Shu tariqa, “Real”dagi kichik kelishmovchilik katta mojaroga aylanmagan bo‘lsa-da, Alonso va Vinisius o‘rtasidagi munosabatlar qayta tiklanishi jamoaning keyingi natijalari uchun muhim omil bo‘lishi mumkin.
“Zamin”ni Telegramʻda oʻqing!
