O‘zbekiston ayollar shaxmat terma jamoasi ilk bor jamoaviy jahon chempionatiga yo‘l oldi. Bu muvaffaqiyatga ular saralash bahsida Ozarbayjon ustidan g‘alaba qozonib erishdi.
Mazkur hal qiluvchi uchrashuv 1-2 noyabr kunlari Bokuda bo‘lib o‘tdi. Tezkor shaxmat formati bo‘yicha o‘tgan qizg‘in bahs natijalariga ko‘ra, O‘zbekiston terma jamoasi tarkibida Afruza Hamdamova, Gulruhbegim Tohirjonova, Umida Omonova va Guldona Karimova ishtirok etib, 2,5:1,5 hisobida g‘alaba qozondi.
Bu g‘alaba jamoaga tarixiy tarzda chempionatning final bosqichiga yo‘l ochdi. Jahon chempionati 18-23 noyabr kunlari Ispaniyaning Linares shahrida o‘tkaziladi.
O‘zbekiston terma jamoasi bilan birga yana 11 kuchli jamoa, jumladan, Ispaniya, Gruziya, Fransiya, Qozog‘iston, AQSh, Xitoy va Hindiston jamoalari ham ishtirok etadi.
