Saudiya Arabistoni poytaxti Ar-Riyod shahrida bo‘lib o‘tayotgan VI Islom Birdamligi o‘yinlari qizg‘in pallaga kirdi. Futzal musobaqasining yarim finalida O‘zbekiston terma jamoasi qit’amizdagi eng kuchli raqiblardan biri — Eron bilan to‘qnash keldi.
Bahs juda tez sur’atda boshlandi. O‘yinning uchinchi daqiqasida terma jamoamiz a’zosi Shahzod Sadiyev aniq zarbasi bilan hisobni ochib, o‘yindagi dastlabki gol muallifi bo‘ldi. O‘zbekiston muxlislari quvonchga cho‘mgan bir pallada raqib ham javob topdi — 5-daqiqada Mas’ud Yusuf Shavardoz hisobni tenglashtirdi.
Birinchi bo‘limda har ikki jamoa bir necha bor xavfli vaziyat yaratdi, ammo darvozabonlar ishonchli harakat qildi. Tanaffusdan keyin esa kurash yanada shiddatli tus oldi. Eron jamoasi yetakchisi Salar Ag‘apour 29-daqiqada jamoasini hisobda oldinga olib chiqdi.
Biroq o‘zbek yigitlari taslim bo‘lishmadi. 31-daqiqada Akbar Usmonov raqib darvozasini aniq nishonga olib, hisobni 2:2 holatiga qaytardi. Bu paytda maydondagi muhit shiddat bilan to‘lib, har ikki jamoa ham final yo‘llanmasi uchun bor kuchini ishga soldi.
Ammo so‘nggi daqiqalarda eronliklar tajribasini namoyish qildi. 32-daqiqada Moslem Oladg‘obod, oradan bir daqiqa o‘tib Ali Xalilvand Somehsofla gol urib, natijani raqib foydasiga hal qildi — 4:2.
O‘yin davomida o‘zbek jamoasi a’zosi Shahram Faxriddinov 20-daqiqada ogohlantirish oldi. Umuman olganda, jamoamiz fidokorona o‘yin ko‘rsatdi, raqibga munosib qarshilik ko‘rsatdi va muxlislar oldida mardona chiqish qildi.
Eron milliy terma jamoasi shunday qilib finalga yo‘l oldi. O‘zbekiston esa endi bronza medali uchun kurashni davom ettiradi. Murabbiylar shtabi fikriga ko‘ra, jamoa ko‘rsatgan o‘yin — keyingi bosqich uchun katta tajriba va ruhiy tayanch bo‘lib xizmat qiladi.
Islom Birdamligi o‘yinlaridagi bu bahs yana bir bor shuni ko‘rsatdiki, o‘zbek futzali mintaqadagi yetakchilar safida va yaqin kelajakda finallar uchun kurashish salohiyatiga ega.
“Zamin”ni Telegramʻda oʻqing!
