O‘zbekiston U-17 terma jamoasining sobiq bosh murabbiyi Islom Ismoilov yana bir karera burilishining ostonasida turibdi. Yosh mutaxassisning o‘zi Instagram sahifasida qoldirgan izohlar esa uning yangi manzili deyarli aniqligini ko‘rsatmoqda. Fuqarolik futbolining eng yosh va eng dinamik murabbiylaridan biri uchun bu navbatdagi jiddiy sinov bo‘ladi.
Islom Ismoilov ijtimoiy tarmoqda o‘z faoliyatidagi muhim bosqichlarni sanab o‘tdi. Uning qaydlariga qaraganda, u har bir ligada o‘zining yoshligi bilan yangi rekordlarni o‘rnatgan:
— 2014-yil — Birinchi ligada eng yosh murabbiy (22 yosh)
— 2020-yil — Pro ligasida eng yosh murabbiy (28 yosh)
— 2021-yil — Superligada eng yosh murabbiy (29 yosh)
— 2025-yil — Osiyo chempionatida eng yosh murabbiy (33 yosh)
— 2025-yil — Jahon chempionatida eng yosh murabbiy (33 yosh)
— 2026-yil — Elit chempionlar ligasida eng yosh murabbiy (34 yosh)
Bu ro‘yxat orqali murabbiy o‘zining yana bir maqsadiga ishora qilgani aniq. Ayniqsa, 2026-yil uchun qayd etilgan “Elit chempionlar ligasi” bandini hisobga olsak, Ismoilovning keyingi manzili to‘g‘risidagi mish-mishlar yanada mustahkamlanadi.
Ma’lumki, kelasi mavsum “Neftchi” elit Osiyo Chempionlar Ligasida ishtirok etadi. Bu esa Ismoilov qayd etgan 2026 yilgi loyiha bilan to‘liq mos tushadi. Shunday ekan, Farg‘ona klubini yosh murabbiy boshqarishi mumkinligi haqidagi ehtimollar kundan kunga ortib bormoqda.
Hozircha “Neftchi” bu haqda rasmiy ma’lumot bermagan. Ammo Vitaliy Levchenko boshchiligidagi jamoa joriy mavsum Superligada chempionlikni qo‘lga kiritgani, yangi bosqich oldidan yangi strategik qarorlar qabul qilinayotganini anglatishi mumkin.
Ko‘rinadiki, Islom Ismoilov uchun ham, “Neftchi” uchun ham katta imkoniyatlar eshigi ochilib turibdi. Endi esa barchasi klubning rasmiy bayonotiga bog‘liq.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
