"Neftchi" futbol klubi rasman ma’lum qilishicha, tajribali nemis mutaxassisi Xans-Yurgen Gyode jamoaga yordamchi murabbiy sifatida qo‘shildi. 1956-yilda Germaniyaning Gelzenkirxen shahrida tug‘ilgan Gyode futbol olamida o‘z nomini ko‘p yillar avvaloq mustahkamlab ulgurgan.
Uning professional futbolchilik faoliyati mashhur “Shalke-04” klubida boshlangan. Keyinchalik “Preussen” va “Fortuna Dyusseldorf” jamoalari safida o‘ynab, ayniqsa, “Fortuna”da bir qator mavsumlar davomida yetakchi futbolchi va jamoa sardori sifatida maydonga tushgan. Gyode Germaniya futbolida iz qoldirgan ijrochilardan biri — u 343 ta uchrashuvda ishtirok etib, 48 ta gol urgan.
1991-yildan boshlangan murabbiylik faoliyati ham uning tajribasi naqadar boy ekanini ko‘rsatadi. Gyode dastlab “Fortuna Dyusseldorf”da ishlagan, shundan keyin Eronning mashhur “Persepolis” klubini boshqargan, yoshlar termalariga rahbarlik qilgan va Osiyo hamda Yevropada qator jamoalarda faoliyat yuritgan.
Uning xalqaro tajribasi juda keng: Eron, Bahrayn, Malayziya, Ozarbayjon, Liviya, Myanma va Germaniya klublarida mehnat qilgan. O‘zbekiston futbol ishqibozlari uchun esa Gyodening nomi begona emas — u 2003–2004-yillarda milliy termamizda avval yordamchi, keyin esa bosh murabbiy sifatida ish olib borgan.
Endilikda tajribali mutaxassis “Neftchi”da Islom Ismoilovga yaqindan yordam beradi. Klub rahbariyati va muxlislar yangi murabbiydan jamoa o‘yinini yanada takomillashtirish, tartib-intizom va taktik ko‘rsatkichlarni yuqori bosqichga olib chiqishni kutmoqda.
"Neftchi"ning yangi murabbiylik shtabi bilan qay darajada o‘sish ko‘rsatishi esa oldindagi uchrashuvlarda o‘z tasdig‘ini topadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
