Turkiya Superligasining 17-turi doirasida «Gaziantep» ustidan 5:1 hisobidagi yirik g‘alabadan so‘ng "Istanbul Bashakshehir" va O‘zbekiston milliy terma jamoasi hujumchisi Eldor Shomurodov jurnalistlar bilan muloqot qildi.
Matbuot anjumanida unga to‘purarlar poygasidagi holati haqida savol berildi. Jurnalistlar Shomurodov ayni paytda gollar soni bo‘yicha peshqadam ekanini, shu jumladan Pol Onuachu, Mauro Ikardi va Anderson Taliska kabi nomdor hujumchilar undan ortda qolayotganini eslatib, bu raqobat haqida fikrini so‘rashdi.
O‘zbekistonlik to‘purar esa savolga juda xotirjam va kamtarona javob qaytardi:
“To‘purarlik poygasida bo‘lish, albatta, yoqimli. Lekin men uchun eng asosiysi — jamoaning g‘alabasi va turnir jadvalida yuqori pog‘onalarga ko‘tarilish. Shaxsiy statistika emas, umumiy natija muhim”, — dedi Shomurodov.
Eslatib o‘tamiz, «Gaziantep»ga qarshi bahsda Eldor bir gol urib, yana bir golli uzatma muallifi bo‘ldi. Shu tariqa, uning joriy mavsumdagi ko‘rsatkichi 12 ta gol va 3 ta assistga yetdi. Bu natija bilan u Turkiya chempionatida «gol+pas» ko‘rsatkichi bo‘yicha mutlaq peshqadamga aylandi.
Mutaxassislar fikricha, Shomurodovning aynan jamoaviy o‘yinni birinchi o‘ringa qo‘yishi «Bashakshehir»ning so‘nggi turlarda barqaror natijalar ko‘rsatishiga xizmat qilmoqda. Muxlislar esa uning nafaqat gollari, balki yetakchilik fazilatlarini ham alohida qadrlamoqda.
Mehmon guruhidagi foydalanuvchilar ushbu nashrga izoh qoldira olmaydi.
