“Anoeta” stadionida “Real Sosedad” — “Barselona” o‘rtasida o‘tgan bahsdan keyin ofsayd bilan bog‘liq epizod futbol jamoatchiligini qattiq qo‘zg‘atdi. Uchrashuv 2:1 hisobida yakunlangan bo‘lsa-da, asosiy muhokama maydoni hisob emas, balki Lamin Yamalning bekor qilingan goli bo‘lmoqda.
Archivo VAR nashri ma’lum qilishicha, yarim avtomatik ofsayd tizimi — SAOT gol epizodini tekshirishda jiddiy xatoga yo‘l qo‘ygan bo‘lishi mumkin. E’tirozlarning markazida — VAR tomonidan tanlangan kadr (freym) turibdi.
Muammo qayerda?
Qoidaga ko‘ra, ofsayd chizig‘i to‘pga so‘nggi bor tegilgan aynan o‘sha lahza bo‘yicha chizilishi shart. Ammo ijtimoiy tarmoqlarda tarqagan suratlar va kadrlar tahliliga ko‘ra, VAR tekshiruvida:
- kechikib tanlangan kadr ishlatilgan — Jyul Kunde to‘pga tegib bo‘lganidan keyingi lahza olingani aytilmoqda;
- aynan shu kechikish sabab Yamalning oyog‘i ofsayddagiday ko‘rinib qolgan;
- holbuki, to‘pga oxirgi tegilgan soniyada Yamalning oyog‘i chiziq ustida, ya’ni ofsaydsiz pozitsiyada bo‘lgani ta’kidlanyapti.
Natijada bir lahzalik “freym” tanlovi butun epizodni teskari ko‘rsatib, golning bekor qilinishiga olib kelgan, degan da’volar ko‘paydi.
“Bu bolalar bog‘chasi emas, bu La Liga!”
Ispaniyalik ekspertlar va “Barselona” muxlislari qarorni qattiq tanqid qilmoqda. Ularga ko‘ra, texnologiya inson omilini kamaytirishi kerak edi, ammo kadrni tanlashdagi xato baribir inson qaroridan kelib chiqyapti va o‘yin taqdiriga bevosita ta’sir ko‘rsatyapti.
Archivo VAR esa vaziyatni keskin ta’riflab, “SAOT Anoetada yana qovun tushirdi” degan ruhda munosabat bildirgani qayd etilmoqda.
Endi nima bo‘ladi?
Hozircha La Liga rahbariyati yoki Hakamlar qo‘mitasi mazkur epizod bo‘yicha rasmiy bayonot bergani yo‘q. Ammo muhokamalar to‘xtagani yo‘q: muxlislar ham, tahlilchilar ham shaffof izoh va texnik protokol kutyapti.
Bitta narsa aniq: agar texnologiya haqiqatan ham adolat uchun xizmat qilsin desak, “freym” tanlash kabi mayda ko‘ringan detallar ham katta mas’uliyat talab qiladi. Chunki futbolda ba’zan bir piksel — bir gol, bir gol esa butun bahs taqdiridir.
“Zamin”ni Telegramʻda oʻqing!
