Londonning «Arsenal» jamoasi bosh murabbiyi Mikel Arteta dam olish kunlari bo‘lib o‘tadigan «Manchester Yunayted»ga qarshi to‘qnashuv oldidan ushbu o‘yin haqida fikr bildirdi. Ispaniyalik mutaxassisning so‘zlariga ko‘ra, mankunianlar ba’zi vaziyatlarda juda xavfli ko‘rinishga kiradi — ayniqsa, tezlikka o‘tish imkoniyati paydo bo‘lsa.
Arteta «Manchester Yunayted»ning kuchli jihatlarini alohida ta’kidladi. Uning aytishicha, raqib safida ayrim futbolchilarga keng joy qolib ketsa, ular tezlikda “uchib” ketadi va bir lahzada o‘yin taqdirini o‘zgartirib yuborishi mumkin.
«Ular ko‘p jihatdan juda kuchli. Ayniqsa, tezlikka o‘tish imkoniyati paydo bo‘lganda, ayrim futbolchilari yugurib ketish uchun sharoit topsa, o‘ta xavfli bo‘lib ketadi. Buni siz bir necha kun oldin Manchesterdagi o‘yinda ham ko‘rdingiz», — dedi «Arsenal» ustozi.
Shu bilan birga, Arteta har qanday jamoada zaif nuqtalar ham bo‘lishini eslab o‘tdi. U «Manchester Yunayted» tarixi, umuman, qarshi hujumlar va tezlik bilan bog‘liq ekanini ta’kidlab, bu klubda doim shunday uslubga mos futbolchilar o‘ynaganini qayd etdi.
«Ularda raqibga muammo tug‘dira oladigan ko‘plab jihatlar bor. Shu bilan birga, har bir jamoaning o‘z zaif tomonlari ham bo‘ladi. "Manchester Yunayted" o‘yini tarixan qarshi hujumlar bilan bog‘liq va bu jamoada doim tezlik bilan yugurib ketishni juda yaxshi biladigan futbolchilar o‘ynagan», — dedi u.
Arteta aniq raqamlarni keltirmagan bo‘lsa-da, bir narsaga ishonchi komilligini aytdi: «Manchester Yunayted» bu jihatdan eng kuchlilar qatorida. Ya’ni, londonliklar uchun asosiy vazifa — raqibga “yo‘lak” qoldirmaslik, orqa chiziqdagi xavfli bo‘shliqlarni yopish va o‘yin nazoratini qo‘ldan chiqarmaslik.
Eslatib o‘tamiz, «Arsenal» va «Manchester Yunayted» o‘rtasidagi bahs 25 yanvar kuni bo‘lib o‘tadi. Muxlislar esa allaqachon “katta afisha” kayfiyatida: chunki bu to‘qnashuvda odatda bir lahza ham zerikishga vaqt qolmaydi — ayniqsa, qarshi hujumlar ishga tushsa.
“Zamin”ni Telegramʻda oʻqing!
