Xabaringiz bor, bugun Xosep Gvardiola boshchiligidagi “Manchester Siti” Angliya Liga kubogi doirasidagi javob bahsida o‘z maydonida “Nyukasl Yunayted”ni qabul qiladi. Katta o‘yin, katta bosim va tabiiyki, muxlislarning eng qiziq savoli bitta — Gvardiola maydonga kimlarni tushiradi?
O‘yin oldidan bir necha mashhur nashrlar “shaharliklar”ning bo‘lajak bahs uchun taxminiy tarkibini e’lon qildi. Qizig‘i, versiyalarda o‘xshash nuqtalar ham bor, ayrim pozitsiyalarda esa jiddiy farqlar ko‘zga tashlanyapti.
Manchester Evening News versiyasi
Ushbu manbaga ko‘ra, “Siti” maydonga quyidagi tarkibda chiqishi mumkin:
Trafford, Nunesh, Husanov, Ake, Ayt-Nuri, Gonzales, O’Rayli, Foden, Semeno, Marmush, Xoland.
Bu yerda e’tiborga molik jihat — markazda Gonzales va O’Rayliga ishonch, hujumda esa Marmush bilan Xolandning birgaligi. Foden va Semeno esa tezlik va kreativni oshirish uchun juda qo‘l keladi.
Sports Mole talqini
Bu nashr boshqacharoq variantni ko‘rsatgan:
Trafford; Nunesh, Husanov, Ake, Ayt-Nuri, Rodri, O’Rayli, Sherki, Bernardu, Semeno, Xoland.
Bu yerda Rodrining qaytishi alohida urg‘u: agar u haqiqatan maydonga tushsa, “Siti”ning o‘yin nazorati va tempi umuman boshqa darajaga chiqadi. Sherki va Bernardu esa ijodkorlikni ko‘paytiruvchi duet sifatida ko‘rilayapti.
Whoscored versiyasi
Whoscored ham deyarli shu tarkibni taklif qildi:
Trafford; Nunesh, Husanov, Ake, Ayt-Nuri, Rodri, O’Rayli, Sherki, Bernardu, Semeno, Xoland.
Ya’ni ularning fikricha ham asosiy tayanch — Rodri, oldingi chiziqda esa Xoland. Semeno esa qanotdagi tezkor bosim va qarshi hujumlarda kalit figura bo‘lishi mumkin.
Sports Illustrated taxmini
Bu nashr esa biroz o‘zgacha yo‘l tutdi:
Trafford; Lyuis, O’Rayli, Husanov, Ake, Gonzales, Sherki, Foden, Bernardu, Semeno, Xoland.
Bu variantda eng qiziq nuqta — Lyuisning maydonda bo‘lishi va O’Raylining orqa chiziqqa yaqinroq keltirilishi. Shuningdek, Foden va Bernarduning bir vaqtda o‘ynashi o‘yinni “paslar orqali yechish” ssenariyiga yaqinlashtiradi.
Toshkent vaqti bilan soat 01:00da start
Ma’lumot o‘rnida, bugungi to‘qnashuv Toshkent vaqti bilan 01:00da boshlanadi. Demak, tungi futbol kayfiyati tayyor: kimdir qahva qiladi, kimdir nervini “tishlab” o‘tiradi, lekin baribir hamma Xolandga bir qarab qo‘yadi — gol bo‘ladimi-yo‘qmi.
Qolaversa, muxlislarimiz uchun yana bir qiziq jihat bor: bir necha versiyada hamyurtimiz Husanovning ismi asosiy tarkibda tilga olingan. Agar u maydonga tushsa, bu o‘yinga qiziqish yanada ortishi turgan gap.
“Zamin”ni Telegramʻda oʻqing!
