Elit Osiyo Chempionlar ligasida O‘zbekiston sharafini himoya qilayotgan Qarshining “Nasaf” klubi navbatdagi bahsini Farg‘onadagi “Istiqlol” stadionida Iroqning “Al-Shorta” jamoasiga qarshi o‘tkazdi. Uchrashuv ancha shiddatli, kurashlarga boy va ehtiyotkor ssenariyda kechdi. Yakunda esa jamoalar murosa ko‘chasini tanladi — 1:1.
Bahs boshlanishi bilan “ajdarlar” tezlikni oshirdi va dastlabki daqiqalardayoq raqibga bosimni kuchaytirdi. Natija uzoq kuttirmadi: 8-daqiqada Sharof Muhitdinovning uzatmasidan keyin Murod Rahmatov aniq zarba yo‘llab, hisobni ochdi. O‘yinning shu qismida “Nasaf”ning ishtiyoqi, harakati va raqib darvozasiga yo‘naltirilgan rejasi yaqqol sezilib turdi.
Birinchi bo‘limda maydonning har bir nuqtasida keskin kurash kuzatildi. “Al-Shorta” ham tezda o‘ziga kelib, qarshi hujumlar orqali xavfli vaziyatlar yaratishga urindi. “Nasaf” esa o‘z navbatida hisobdagi ustunlikni saqlab qolish bilan birga ikkinchi golni topishga harakat qildi. Ammo o‘yin shunday tus oldiki, har bir xato juda qimmatga tushishi mumkin edi.
Ikkinchi bo‘limda mehmonlar tarkibiy o‘zgarishlar bilan maydonga qaytdi va bu ularning o‘yiniga sezilarli ta’sir ko‘rsatdi. “Al-Shorta” to‘p nazoratini ko‘proq qo‘lga ola boshladi, bosimni oshirdi va 68-daqiqada Sharif Abdulhakim jamoasiga tenglik golini keltirdi. Shu tariqa hisob 1:1 ko‘rinishiga keldi.
Qolgan daqiqalarda “Nasaf” yana oldinga intildi — muxlislar ham oxirigacha gol kutdi. Biroq vaziyatlardan foydalanish yetishmadi, raqib esa tartibli himoya bilan qarshi tura oldi. Uchrashuvning oxirgi qismida faollik yuqori bo‘lsa-da, tabloda raqamlar o‘zgarmadi.
O‘yin davomida intizom ham ancha qattiq edi. “Nasaf” safidan Bobir Abdixoliqov, Adenis Shala va Oybek Rustamov ogohlantirish oldi. Bu ham bellashuv qanday darajada murosasiz kechganini ko‘rsatib turdi.
Elit OCHL. 7-tur
"Nasaf" – "Al Shorta" (Iroq) 1:1
Farg‘ona. "Istiqlol" stadioni. 18:45
Gol: Murod Rahmatov (Sharof Muhitdinov) 8 - Sharif Abdulhakim 68.
"Nasaf": 35.Abduvohid Ne’matov, 2.Alibek Davronov, 5.G‘olib G‘aybullayev, 6.Murod Rahmatov, 7.Adenis Shala, 8.Zafarmurod Abdiraxmatov, 14.Sharof Muhitdinov, 15.Oybek Rustamov, 24.Sardor Bahromov, 45.Bobir Abdixoliqov, 92.Umar Eshmurodov.
Zaxira: 21.Samandar Muratbayev, 82.Asilbek No‘monov, 3.Mashhur Abdisoliyev, 20.Yusuf Otubanjo, 23.Dilshod Murtozayev, 27.Yashnar Berdirahmonov, 32.Quvonch Xushvaqtov, 33.Bahodir Xalilov, 55.Diyor Abdunazarov, 80.Davron Usmonov, 99.Kingsli Sokari.
"Al Shorta": 16.Hasan Ahmad Hussayn, 4.Munaf Yunus (14.Abdul Magid 46), 7.Mahmud Almavas, 8.Mendi Dominike, 9.Hussayn Al Saidi, 13.Toriq Aggun, 20.Mutez Zaddim, 23.Mustafo Saadun (21.Sharif Abdulkadim 46), 25.Abdurazzoq Qosim, 28.Hussayn Jabbor (11.Bassam Shokir 46) 30.Fahad Yussuf.
Zaxira: 22.Muhammad Karim, 15.Ahmad Yahyo, 17.Ahmad Farhan, 19.Salim Ahmed, 24.Abbos Fadhil, 31.Athir Solih.
Ogohlantirishlar: Bobir Abdixoliqov (45), Shala (47), Rustamov (58).
Qisqasi, “Nasaf” erta gol bilan muxlislarni quvontirdi, ammo g‘alaba uchun yana bir qadam yetishmadi. Baribir, bunday o‘yinlar jamoani chiniqtiradi: Elit OCHLda har bir ochko oltinga teng. Endi “ajdarlar” navbatdagi bahslarda bu durangdan to‘g‘ri xulosa chiqarib, g‘alabalar seriyasiga chiqishga harakat qiladi.
“Zamin”ni Telegramʻda oʻqing!
