Ispaniya kubogi yarimfinalida kutilgan katta to‘qnashuv bor edi, lekin “Metropolitano”da bo‘lgan voqea ko‘pchilik tasavvur qilgan ssenariyni yerga urib tashladi. “Atletiko” o‘z uyida “Barselona”ni javobsiz 4:0 hisobida yengdi — eng ta’sirlisi, barcha gollar birinchi bo‘limning o‘zida kiritildi.
O‘yin endigina boshlangan paytdayoq “Barsa”ning boshiga muzdek suv quyildi: 6-daqiqada Erik Garsiya to‘pni o‘z darvozasiga kiritib qo‘ydi. Shu avtogol o‘yinning ruhiy sur’atini ham “Atletiko” tomon burib yubordi. Mezbonlar shu zahoti bosimni yanada oshirdi, tanaffusgacha “Barselona”ni himoyada “qimirlatmay” qo‘yishga harakat qildi.
14-daqiqada Antuan Grizmann o‘zining "klass"ini ko‘rsatib, hisobni 2:0 qildi. “Atletiko”ning kechagi harakatlari juda aniq: yuqori temp, qattiq pressing, hujumda sovuqqon qarorlar. 33-daqiqada Lukman to‘pni darvozaga joylab qo‘ydi — 3:0. Birinchi bo‘limga qo‘shib berilgan daqiqalarda esa Alvares to‘rtinchi golni urib, “Barsa” uchun bu kechani rasman og‘ir tushga aylantirdi — 4:0.
Ikkinchi bo‘limda “Barselona” o‘zini yig‘ishga urinib ko‘rdi, almashinuvlar ham bo‘ldi. Ammo birinchi bo‘limdagi zarba shunchalik qattiq ediki, o‘yinning umumiy kayfiyati o‘zgarmadi. Ustidan-ustak, 86-daqiqada Erik Garsiya qizil kartochka oldi — bu esa javob o‘yini oldidan kataloniyaliklar uchun yana bir og‘riqli nuqta bo‘ldi.
Ispaniya kubogi
Yarimfinal. Birinchi o‘yin
Atletiko — Barselona 4:0
12 fevral, «Metropolitano»
Gollar: E.Garsiya (6, avtogol), Grizmann (14), Lukman (33), Alvares (45+2).
Atletiko — Musso, Molina, Pubill, Hansko, Rujeri, Simeone, Lorente, Koke (Le Norman, 90+1), Lukman (Almada, 73), Grizmann (Baena, 68), Alvares (Syorlot, 68).
Barselona — X.Garsiya, Kunde, Kubarsi (Arauxo, 77), E.Garsiya, Balde (Kanselu, 77), Kasado (Levandovski, 37), De Yong, Fermin (Martin, 88), Yamal, Olmo, Torres.
Ogohlantirishlar: Kasado (26), Simeone (50), Lorente (51), Baena (79), Olmo (87), Pubil (87), Fermin (87), Rujeri (90+8).
Chetlatish: E.Garsiya (86).
Shu tariqa, “Atletiko” finalga bir qadam qoldirdi, “Barselona” esa endi 3 mart kuni Kataloniyadagi javob uchrashuvida mo‘jiza izlashga majbur. 0:4 — bu oddiy mag‘lubiyat emas, bu butun rejani qayta yozishga majbur qiladigan hisob.
Bir narsa aniq: bu to‘qnashuv hali tugamadi. “Barsa” uyda boshqacha o‘ynashi mumkin, lekin “Atletiko” ham bunday ustunlikni qo‘ldan chiqarishni yoqtirmaydi. 3 martda Kataloniyada haqiqiy nervlar jangi bo‘ladi.
