«Manchester Siti»da yoz yaqinlashgan sari bir savol ko‘proq aylanyapti: Bernardu Silva qoladimi yoki ketadimi? Muxlislar har xil taxmin qilayapti, matbuot turli versiyalarni chiqaryapti, ammo jamoa bosh murabbiyi Pep Gvardiola bu masalada hali hech qanday aniq ma’lumotga ega emasligini ochiq aytdi.
Pepning javobi oddiy, lekin juda ham to‘g‘ri: “Yo‘q. Menda hech qanday tasavvur yo‘q. Rostdan aytyapman. Lekin biror qarorga kelsa, menga xabar berishini aytdim. Bilganim shu. Qolganidan bexabarman”. Ya’ni, Gvardiola hozir “insaydchi” emas — u ham barcha kabi qarorni kutib turibdi.
Vaziyatning jiddiyligi shundaki, Bernarduning «shaharliklar» bilan amaldagi shartnomasi yozda yakuniga yetadi. Demak, klub uchun ham, futbolchining o‘zi uchun ham qaror vaqti kelyapti: yoki yangi kelishuv, yoki yangi sahifa.
Bernardu Silva — bu oddiy yarimhimoyachi emas. U 2017 yil yozidan beri «Manchester Siti» safida to‘p tepib kelyapti va shu vaqt ichida klub tarixidagi eng barqaror, eng “ishonchli” figuralardan biriga aylandi. Raqamlar ham buni tasdiqlaydi: 442 ta o‘yin, 74 ta gol, 78 ta golli uzatma. Bunday statistika har mavsumda o‘zini “o‘chirmay” kelgan futbolchiga xos.
Muxlislar uchun esa bu mavzuda bitta xavotir bor: Bernardu ketsa, jamoa maydonidagi temp, pressing va aqlli harakatlardan bir qismi ham ketib qoladimi? Chunki u — “ko‘rinmay ish qiladigan” futbolchilar toifasidan: har doim to‘pga yaqin, har doim kerakli joyda, har doim jamoa uchun.
Hozircha esa hech kim aniq aytolmaydi. Bir narsa ma’lum: qaror chiqqan kuni «Siti» muxlislari uchun yozgi transferlar bozori oddiy yangiliklar emas, haqiqiy nerv-imtihonga aylanadi. Gvardiola aytganidek, endi hamma narsa Bernardudan keladigan xabarga bog‘liq.
