Angliya Premyer-ligasining 32-turi doirasida Londonda bo‘lib o‘tgan markaziy uchrashuvda "Manchester Siti" muhim g‘alabaga erishdi. “Shaharliklar” mehmon sifatida maydonga chiqib, “Chelsi” jamoasini 3:0 hisobida mag‘lub etdi va chempionlik uchun kurashni yana-da qizitdi.
Ushbu g‘alabadan so‘ng jamoa bosh murabbiyi Pep Gvardiola o‘yin haqida o‘z fikrlarini bildirdi. Uning aytishicha, ikkinchi bo‘limda jamoa ancha yaxshi o‘ynagan, birinchi taym esa yomon bo‘lmagan, lekin reja to‘liq amalga oshmagan.
Murabbiy qanotlar orqali hujumlarga ham to‘xtalib o‘tdi. Uning fikricha, chap qanotda xavfli vaziyatlar ko‘proq yaratilgan, ammo o‘ng qanotda samaradorlik yetarli darajada bo‘lmagan. Shu bilan birga, Jeremi Doku o‘ng qanotda ham kuchli hujumchi ekanini taʼkidladi.
Gvardiola yosh yarim himoyachi Rayan Sherki haqida ham alohida to‘xtaldi. Uning so‘zlariga ko‘ra, futbolchi baʼzi vaziyatlarda juda orqaga tushib o‘ynagan va hatto darvozabonga yaqin hududlarda harakat qilgan. Murabbiy esa bunday isteʼdodni hujumning so‘nggi qismida, hujumchilar va qanot o‘yinchilariga yaqinroq joyda samaraliroq ishlatish kerakligini aytdi.
Shuningdek, u futbolchining yosh ekanini va bu APLdagi birinchi mavsumi ekanini eslatdi. U hozircha o‘z iqtidorini namoyish etgan bo‘lsa-da, kelajakda yana-da kuchliroq bo‘lishga intilayotganini qayd etdi.
Chempionlar ligasida ishtirok etmayotgan holat jamoani yana-da sergak qilgani ham taʼkidlandi. Gvardiola fikricha, oxirgi uch o‘yinda ular yuqori darajadagi raqiblarga qarshi o‘ynagan va bu tayyorgarlikka ijobiy taʼsir ko‘rsatmoqda.
“Har doim ideal bo‘lmasak ham, ishonchli harakat qildik va o‘zimiz uchun xavfli vaziyatlar yaratdik,” — dedi u.
Hozirda “Manchester Siti” 64 ochko bilan 2-o‘rinda bormoqda. Jamoa bir nechta o‘yinni kam o‘tkazgan holda peshqadam Arsenaldan 6 ochko orqada qolmoqda.
Chempionlik uchun kurash esa hali endi eng qizg‘in pallaga kirmoqda.
“Zamin”ni Telegramʻda oʻqing!
